ហ្សាការតា៖ ទីភ្នាក់ងារព័ត៌មានចិនស៊ិនហួ បានចុះផ្សាយកាលពីរាត្រីថ្ងៃទី៧ ខែតុលា ឆ្នាំ២០២០ថា ប្រទេសឥណ្ឌូនេស៊ី នឹងធ្វើការដាំឡើងនូវប្រភេទ ឈើកោងកាងប្រមាណ ៦០០.០០០ហិកតា នៅក្នុងតំបន់ជាច្រើន នៅក្នុងរយៈពេល ៣ឆ្នាំខាងមុខនេះ ។ ក្រសួងកិច្ចការវិនិយោគ និងជើងទឹក បានឲ្យដឹងកាលពីថ្ងៃពុធ ។
រដ្ឋមន្ត្រី Luhut Binsar Pandjaitan បានថ្លែងនៅអង្គពិធីស្តារសេដ្ឋកិច្ចជាតិថា “ព្រៃកោងកាងរបស់យើង បានរងការបំផ្លិចបំផ្លាញនៅក្នុងតំបន់ ជាច្រើនប្រមាណជិត ១លានហិកតា ។ គោលដៅរបស់យើង នៅក្នុងរយៈពេល០៣ឆ្នាំខាងមុខ គឺ (ធ្វើការដាំឡើងវិញ) ប្រមាណ ៦០០.០០០ហិកតា តាមរយៈកម្មវិធីនេះ” ។
លោក Pandjaitan បានថ្លែងថា ការដាំដើមឈើកោងកាង ឡើងវិញនៅក្នុងតំបន់ជាច្រើន នឹងជះឥទ្ធិពលដល់ពាណិជ្ជកម្ម នៃការធ្វើឲ្យថយចុះនូវសារធាតុកាបូន ឬគេស្គាល់ថា ឥណទានកាបូន ក្នុងចំណោមប្រទេសជាច្រើន ។
គេបានដឹងថា ឥណ្ឌូនេស៊ី មានប្រមាណ ៧៥ដល់៨០ភាគរយ ដែលជាប្រទេសមានឥណទាន កាបូនរបស់ពិភពលោក ពីព្រៃឈើ ដើមឈើកោងកាង រុក្ខជាតិផ្តល់ផលជាប្រេង និងផ្កាថ្មជាច្រើន ៕
ប្រែសម្រួលដោយ៖ ម៉ៅ បុប្ផាមករា
