អត្ថបទ

ភោជនីយដ្ឋាន និងកាហ្វេ អ៊ីអ៊ែនអឹម ចែកអាហារ និងភេសជ្ជ: ១០០០កញ្ចប់

ភ្នំពេញ៖ ភោជនីយដ្ឋាន និងកាហ្វេ អ៊ីអ៊ែនអឹម (E&M) នៅថ្ងៃទី១៧ ខែកញ្ញា ឆ្នាំ២០២១ បានរៀបចំកម្មវិធីសប្បុរសធម៌ ក្រោមយុទ្ធនាការបេសកកម្មតែមួយ បន្តចែកបាយនិងភេសជ្ជៈ ចំនួន១០០០កញ្ចប់ ដោយការជិះស៊ីក្លូចែកអាហារ ដល់ប្រជាពលរដ្ឋ ដែលមានជីវភាពខ្វះខាត នៅតាមដងផ្លូវមួយចំនួន ក្នុងរាជធានីភ្នំពេញ ដើម្បីជាការចូលរួមចំណែក ជួយគ្នាក្នុងគ្រាដ៏លំបាក នៅក្នុងស្ថានភាពកូវីដ១៩នេះ។

យោងតាមប្រភពពត៌មាន បានអោយដឹងថាភោជនីយដ្ឋាន និងកាហ្វេ អ៊ីអ៊ែនអឹម មានគោលបំណងនឹងបន្តចែកបាយ និងភេសជ្ជៈដល់ប្រជាពលរដ្ឋ ក្នុងរយៈពេល៤ខែជាប់ៗគ្នា រហូតដល់ ១០០០ កញ្ចប់ ដើម្បីអាចចូលរួម ជួយសម្រាលការលំបាក របស់ប្រជាជនកម្ពុជាបានខ្លះៗ ទៅតាមលទ្ធភាព ដែលខ្លួនអាចធ្វើបាន។

បន្ថែមលើសពីនេះទៅទៀត ពួកយើងក៏ត្រូវតែបន្តអនុវត្ត​ នូវគោលការណ៍៣កុំ៣ការពារ របស់រាជរដ្ឋាភិបាល ដើម្បីចូលរួមប្រយុទ្ធប្រឆាំង និងជម្ងឺដ៏កាចសាហាវ និងយកឈ្នះ ក្នុងគ្រាលំបាកនេះជាមួយគ្នា។

គួរឲ្យដឺងផងដែរថា ភោជនីយដ្ឋាន អ៊ីអ៊ែនអឹម (E&M) បានបង្កើតឡើង នៅក្នុងឆ្នាំ២០១៤ ដោយសារតែមានការបន្តគាំទ្រ ពីសំណាក់អតិថិជន រហូតមកដល់បច្ចុប្បន្ន ភោជនីយដ្ឋាន និងកាហ្វេ អ៊ីអ៊ែនអឹម (E&M) មានសាខា ចំនួន២ទីតាំងហើយ គឺទី១នៅបឹងកេងកង និង ទី២នៅផ្សារទំនើបជីបម៉ុងបាក់ទូក។

លក្ខណៈពិសេសរបស់ E&M Coffee គឺការផ្តល់ឲ្យអតិថិជននូវបរិយាកាសមួយ ដ៏សម្បូរបែបតាមរយៈបរិយាកាស នៅក្នុងហាង ម្ហូបអាហារច្រើនមុខដ៏ឈ្ងុយឆ្ងាញ់ ភេសជ្ជៈជាច្រើនជម្រើស និងបទពិសោធន៍មួយយ៉ាងល្អ៕

To Top