បរទេស៖ ការសាកល្បង ទៅលើមនុស្សរបស់វ៉ាក់សាំង ឈ្មោះ Nanocovax ដើម្បីការពារវីរុសកូវីដ១៩ ដំបូងបង្អស់របស់ប្រទេសវៀតណាម បានចាប់ផ្តើមហើយ នៅព្រឹកថ្ងៃព្រហស្បតិ៍ ទី១៧ធ្នូ ដោយមានអ្នកស្ម័គ្រចិត្តចំនួន ៣នាក់ ដំបូងគេដែលទទួលការចាក់វ៉ាក់សាំងនេះ។
យោងតាមសារព័ត៌មាន VN Express ចេញផ្សាយនៅថ្ងៃទី១៧ ខែធ្នូ ឆ្នាំ២០២០ បានឱ្យដឹងថា ក្នុងចំណោមអ្នកស្ម័គ្រចិត្តសាកល្បងថ្នាំ រួមមាន បុរសចំនួន ២នាក់ និងស្ត្រីម្នាក់ ពួកគេមានអាយុ ២០ ឆ្នាំ ដែលមិនត្រូវបានបង្ហាញអត្តសញ្ញាណ ត្រូវបានចាក់វ៉ាក់សាំងនៅម៉ោង ៨ ព្រឹក នៅឯសាកលវិទ្យាល័យ វេជ្ជសាស្ត្រយោធាវៀតណាម នៅទីក្រុងហាណូយ ហើយស្ថិតក្នុងស្ថានភាពនឹងនរ បន្ទាប់ពីពីរម៉ោងពេលចាក់រួច។ ពួកគេនឹងត្រូវត្រួតពិនិត្យរយៈពេល ៧២ ម៉ោង។
ពួកគេត្រូវបានជ្រើសរើស ក្នុងចំណោមអ្នកស្ម័គ្រចិត្តជាង ២០០ នាក់ ដែលបានចុះឈ្មោះ សម្រាប់ការសាកល្បងវ៉ាក់សាំង ដែលបង្កើតឡើងដោយ Nanogen Pharmaceutical Biotechnology JSC ។
ឧត្តមសេនីយ៍ទោ Do Quyet សាកលវិទ្យាធិការ នៃសាកលវិទ្យាល័យបាននិយាយថា “វាដល់ពេលដែលវៀតណាម ប្រាប់ពិភពលោកថា យើងអាចធ្វើវាបាន ហើយតាមពិតយើង បានបង្ហាញខ្លួនយើង ក្នុងការប្រយុទ្ធប្រឆាំងនឹងជំងឺកូវីដ១៩ រហូតមកដល់ពេលនេះ” ។
លោកង្វៀន ងូកាង អនុប្រធានរដ្ឋបាលវិទ្យាសាស្ត្រ បច្ចេកវិទ្យានិងបណ្តុះបណ្តាល នៃក្រសួងសុខាភិបាល បាននិយាយថា ប្រទេសវៀតណាម នៅតែមានការប្រយុទ្ធប្រឆាំង នឹងរោគរាតត្បាតនៅខាងមុខ ហើយវាត្រូវការកិច្ចសហប្រតិបត្តិការ មិនត្រឹមតែពីអ្នកវិទ្យាសាស្ត្រប៉ុណ្ណោះទេ គឺថែមទាំងអាជ្ញាធរ និងសហគមន៍ ជាពិសេសអ្នកស្ម័គ្រចិត្តផងដែរ៕ ប្រែសម្រួលៈ ណៃ តុលា
