វ៉ាស៊ីនតោន៖ ក្រសួងពាណិជ្ជកម្មបានឱ្យដឹង កាលពីថ្ងៃអង្គារថា ឱនភាពពាណិជ្ជកម្មសហរដ្ឋអាមេរិក ជាមួយប្រទេសចិន នៅតែមិនផ្លាស់ប្ដូរនៅក្នុងខែកញ្ញា ពោលគឺស្មើនឹង ៣១,៦២ ពាន់លានដុល្លារ នេះបេីយោងតាមការចុះផ្សាយ របស់ទីភ្នាក់ងារសារព័ត៌មាន ក្យូដូជប៉ុន។
ទន្ទឹមនឹងនេះដែរឱនភាពជាមួយជប៉ុន បានថយចុះ ១៩,១ ភាគរយស្មើនឹង ៥,០៥ ពាន់លានដុល្លារដែលធ្វើឱ្យប្រទេសនេះក្លាយជាប្រទេស ដែលមានឱនភាពធំជាងគេទី៣ សម្រាប់សហរដ្ឋអាមេរិក បន្ទាប់ពីប្រទេសចិន និងម៉ិកស៊ិក។
ក្រោមការគ្រប់គ្រងនៃ គោលនយោបាយ អាមេរិកដំបូង ប្រធានាធិបតីលោក ដូណាល់ ត្រាំ បានសន្យាកាត់បន្ថយឱនភាពពាណិជ្ជកម្មសហរដ្ឋអាមេរិក ជាមួយជប៉ុន និងដៃគូពាណិជ្ជកម្មសំខាន់ៗដទៃទៀត ដូចជាប្រទេសចិន ម៉ិកស៊ិក និងអាល្លឺម៉ង់។
នៅក្នុងខែកញ្ញារដ្ឋបាលលោក ត្រាំ បានចាប់ផ្តើមគិតពន្ធចំនួន ១៥ ភាគរយលើទំនិញចិន ដែលមានតម្លៃជាង ១០០ ពាន់លានដុល្លារ ដែលជាផ្នែកមួយ នៃសង្គ្រាមពាណិជ្ជកម្ម រវាងប្រទេសដែលមានសេដ្ឋកិច្ច ធំជាងគេទាំងពីរនៅលើពិភពលោក៕
ដោយ ឈូក បូរ៉ា
