បរទេស៖ ប្រទេសកូរ៉េខាងជើង នៅថ្ងៃអាទិត្យម្សិលមិញនេះ បាននិយាយថា ខ្លួនទើបបានធ្វើតេស្ត សាកល្បងដ៏សំខាន់មួយ នៅកន្លែងបាញ់បង្ហោះ ផ្កាយរណប ភាគខាងលិច របស់ខ្លួន ហើយការធ្វើតេស្តជោគជ័យ នឹងដើរតួនាទីដ៏សំខាន់ ក្នុងដំណើរផ្លាស់ប្តូរ គោលជំហរយុទ្ធសាស្ត្រ របស់ប្រទេស នាពេលអនាគត ដ៏ជិតខាងមុខ។
កូរ៉េខាងជើង មិនបាននិយាយប្រាប់ថា អ្វីដែលត្រូវបានយកទៅធ្វើ តេស្តនោះទេ ចំណែកអគ្គសេនាធិការ កូរ៉េខាងត្បូងវិញ បាននិយាយថា គ្មានអ្វីត្រូវបានគេបាញ់ចេញ ពីស្ថានីយបាញ់ បង្ហោះផ្កាយរណប Sohae របស់ប្រទេសកូរ៉េខាងជើង នោះឡើយ។
ប៉ុន្តែប្រទេសកូរ៉េខាងជើង តាមសេចក្តីរាយការណ៍ បានបង្ហាញសញ្ញារៀបចំ សម្រាប់ការតេស្ត ម៉ាស៊ីនមីស៊ីល នៅកន្លែងបាញ់បង្ហោះ ផ្កាយរណបនោះ កាលពីពេលថ្មីៗនេះ ហើយការអះអាង កាលពីថ្ងៃអាទិត្យនោះ អាចមានន័យថា កូរ៉េខាងជើងតេស្ត សាកល្បងបានជោគជ័យ នូវម៉ាស៊ីនរ៉ុកកែតថ្មី ដែលអាចប្រើក្នុងការបាញ់ បង្ហោះរ៉ុកកែត រយៈចម្ងាយវែង ឬក៏មីស៊ីលផ្លោង ឆ្លងទ្វីបថ្មី៕
ប្រែសម្រួល៖ប៉ាង កុង
