ព័ត៌មានអន្តរជាតិ

អាមេរិក សង្ឃឹមថាកូរ៉េខាងជើង នឹងចៀសវាងការ សាកល្បងនុយក្លេអ៊ែរ និងមីស៊ីលរយៈចម្ងាយឆ្ងាយ

វ៉ាស៊ីនតោន៖ រដ្ឋមន្រ្តីការបរទេសលោក Mike Pompeo បានលើកឡើងថា សហរដ្ឋអាមេរិកសង្ឃឹមថា កូរ៉េខាងជើងនឹងបន្តចៀសវាង ការសាកល្បងនុយក្លេអ៊ែរ និងការបាញ់សាកល្បងមីស៊ីល រយៈចម្ងាយឆ្ងាយរបស់ខ្លួន បន្ទាប់ពីទីក្រុងព្យុងយ៉ាង បានឲ្យដឹងថា ខ្លួនបានធ្វើការសាកល្បង “សំខាន់ណាស់” កាលពីចុងសប្តាហ៍។

កូរ៉េខាងជើង បានឲ្យដឹងថា ការសាកល្បងនេះបានកើតឡើង នៅឯកន្លែងបាញ់បង្ហោះផ្កាយរណបដុងឆាងរី របស់ខ្លួនកាលពីថ្ងៃសៅរ៍ ដោយបង្កើនភាពតានតឹង នៅមុនថ្ងៃផុតកំណត់ចុងឆ្នាំ ដែលមេដឹកនាំកូរ៉េខាងជើងលោក គីម ជុងអ៊ុន បានដាក់សម្រាប់សហរដ្ឋអាមេរិក ដើម្បីបង្ហាញភាពបត់បែន ក្នុងការចរចាររបស់ពួកគេ ស្តីពីការរុះរើកម្មវិធីអាវុធនុយក្លេអ៊ែរ របស់ទីក្រុងព្យុងយ៉ាង ។

លោក Pompeo បានឲ្យដឹងនៅក្នុងសន្និសីទសារព័ត៌មាន រួមគ្នាជាមួយរដ្ឋមន្ត្រីការបរទេសរុស្ស៊ីលោក Sergey Lavrov នៅឯក្រសួងការបរទេសថា “លោកគីម ផ្ទាល់បានប្តេជ្ញាបដិសេធ នុយក្លេអ៊ែរដោយនិយាយថា នឹងមិនមានការធ្វើតេស្ត មីស៊ីលរយៈចម្ងាយឆ្ងាយ និងការធ្វើតេស្តនុយក្លេអ៊ែរទេ” ៕

ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top