បរទេស៖ បន្ទាប់ពីការវាយប្រហារតាមអាកាស របស់អាមេរិកនៅអ៊ីរ៉ាក់ ដែលបានសម្លាប់ឧត្តមសេនីយ៍កំពូលអ៊ីរ៉ង់ Qasem Soleimani មកនោះ សភាអ៊ីរ៉ាក់បានបោះឆ្នោតនៅថ្ងៃទី ៥ ខែមករា ដើម្បីបណ្តេញវត្តមាន យោធាបរទេសចេញពីប្រទេសខ្លួន រួមទាំងកងទ័ពអាមេរិកផងដែរ ដែលអ៊ីរ៉ាក់ បានអញ្ជើញមកកាលពីឆ្នាំ ២០១៤ ដើម្បីប្រយុទ្ធនឹងការលុកលុយរបស់ក្រុមឧទ្ទាម Daesh ។
យោងតាមសារព័ត៌មាន Sputnik ចេញផ្សាយនៅថ្ងៃទី១២ ខែមករា ឆ្នាំ២០២០ បានឱ្យដឹងថា តាមសេចក្តីរាយការណ៍របស់មន្រ្តីអ៊ីរ៉ាក់ដែលដកស្រង់ដោយសារព័ត៌មាន The Wall Street Journal (WSJ ) បានអោយដឹងថា រដ្ឋាភិបាលទីក្រុងវ៉ាស៊ីនតោន បានព្រមានថា ទីក្រុងបាកដាដ អាចនឹងបាត់បង់សិទ្ធិ ចូលដំណើរការគណនីធនាគារកណ្តាលរបស់ខ្លួននៅឯធនាគារបម្រុងសហព័ន្ធ នៃទីក្រុងញូវយ៉ក ប្រសិនបើអ៊ីរ៉ាក់ អនុម័តលើការសម្រេចចិត្តរបស់ខ្លួន ក្នុងការបណ្តេញកងទ័ពអាមេរិកចេញពីតំបន់នេះ។
ដោយដកស្រង់មធ្យោបាយផ្សេងទៀត នៃសម្ពាធដែលរដ្ឋបាលអាមេរិកអាចប្រើ បានដូចជាការបដិសេធមិនផ្តល់ការលះបង់ឡើងវិញលើការដាក់ទណ្ឌកម្ម ប្រឆាំងនឹងអ៊ីរ៉ង់។ បច្ចុប្បន្នទីក្រុងវ៉ាស៊ីនតោន អនុញ្ញាតឱ្យអ៊ីរ៉ាក់នាំចូលឧស្ម័នពីអ៊ីរ៉ង់ ទៅម៉ាស៊ីនភ្លើង ដែលផ្គត់ផ្គង់ថាមពលភាគច្រើន របស់ប្រទេស ទោះបីមានការដាក់ទណ្ឌកម្មក៏ដោយប៉ុន្តែការរៀបចំនេះ នឹងត្រូវផុតកំណត់នៅខែកុម្ភៈ។
មន្ត្រីនៅក្នុងការិយាល័យរបស់លោក Adel Abdul-Mahdi ជានាយករដ្ឋមន្រ្តី ត្រូវបានគេលើកឡើងថា លោកនាយករដ្ឋមន្រ្តីបានទទួលការព្រមានទាក់ទងនឹងគណនីធនាគារ ដែលទទួលបានប្រាក់ចំណូលរាប់ពាន់លានពីប្រាក់ចំណូលប្រេង ក្នុងកំឡុងពេលនិយាយតាមទូរស័ព្ទនៅថ្ងៃពុធទី ៨ ខែមករា។
សូមជម្រាបថា ប្រទេស អ៊ីរ៉ាក់ក៏ដូចជាបណ្តាប្រទេសជាច្រើនទៀត គឺបានរក្សាគណនីរដ្ឋាភិបាល នៅឯធនាគារសហព័ន្ធ ញូវយ៉ក ដែលតាមរយៈគណនីនេះ គឺអ៊ីរ៉ាក់អាចគ្រប់គ្រងហិរញ្ញវត្ថុជាតិ រួមទាំងប្រាក់ចំណូលពីការលក់ប្រេង។ អ៊ីរ៉ាក់បានចំណាយលុយនោះដើម្បីទូទាត់ទៅលើប្រាក់ខែ និងកិច្ចសន្យារបស់រដ្ឋាភិបាល។
ខណៈពេលដែលមិនមានព័ត៌មានអំពីចំនួនទឹកប្រាក់របស់អ៊ីរ៉ាក់ដែលធនាគារកណ្តាលកំពុងកាន់កាប់ នាពេលបច្ចុប្បន្ន បើយោងតាម WSJ អ៊ីរ៉ាក់បានដាក់ប្រាក់បញ្ញើចំនួន ៣ ពាន់លានដុល្លារ ក្នុងមួយយប់ ពីធនាគារកណ្តាលរបស់ប្រទេសនេះនៅចុងឆ្នាំ ២០១៨ ៕
ប្រែសម្រួលៈ ណៃ តុលា
