បរទេស៖ ប្រទេសកូរ៉េខាងត្បូង និងសហរដ្ឋអាមេរិក នៅពេលថ្មីៗនេះ តាមសេចក្តីរាយការណ៍ បានបង្កើតឲ្យមានការវិវត្តទៅមុខខ្លះៗ ស្តីពីកិច្ចពិភាក្សាចរចាគ្នា ដើម្បីកំណត់ចំណែកនៃ ការចំណាយរបស់ទីក្រុងសេអ៊ូល ចំពោះការដាក់ឲ្យកងទ័ពអាមេរិក ឈរជើងក្នុងប្រទេសកូរ៉េខាងត្បូង ។
ប្រធានមន្ត្រីចរចារបស់ទីក្រុងសេអ៊ូល លោក Jeong Eun-bo បាននិយាយយ៉ាងដូច្នោះ ក្នុងខណៈលោកកំពុងធ្វើដំណើរ ចេញទៅទីក្រុងវ៉ាស៊ីនតោន ដើម្បីប្រារព្ធធ្វើកិច្ចពិភាក្សាគ្នា ជុំមួយផ្សេងទៀត ជាមួយសមភាគី សហរដ្ឋអាមេរិករបស់លោក គឺលោក James DeHart ដែលគ្រោងធ្វើឡើងរហូតដល់ថ្ងៃពុធ។
យោងតាមសេចក្តីរាយការណ៍ ពីកាសែតកូរ៉េខាងត្បូង យុនហាប់ ចេញផ្សាយនៅថ្ងៃទី១៣ ខែមករា ឆ្នាំ២០២០ បានឲ្យដឹងថា លោកបាននិយាយប្រាប់អ្នកសារព័ត៌មាន នៅអាកាសយានដ្ឋានអន្តរជាតិ Incheon ដូច្នេះថា “យើងវាយតម្លៃថា ការវិវត្តរីកចម្រើនទៅមុខ ត្រូវបានបង្កើតឲ្យមានឡើងខ្លះៗ និងថា យើងបានពង្រីកការយោគយល់ពីគ្នា តាមរយៈកិច្ចចរចាគ្នាជាបន្តបន្ទាប់ ដែលយើងមានរហូតដល់ពេលនេះ” ៕
ប្រែសម្រួល៖ ប៉ាង កុង
