ព័ត៌មានអន្តរជាតិ

សមាជិកសភាអ៊ីរ៉ង់ ប្រកាសផ្តល់រង្វាន់លុយសុទ្ធ ៣លានដុល្លារ ឱ្យតែនរណាអាចសម្លាប់ ប្រធានាធិបតីអាមេរិក ត្រាំ បាន

បរទេស៖ មុននេះមេដឹកនាំកំពូលអ៊ីរ៉ង់លោក Ali Khamenei ខណៈពេលកំពុងដឹកនាំ ការអធិស្ឋាននៅទីក្រុងតេហេរ៉ង់ បានកត់សម្គាល់ថា ការធ្វើឃាតមេបញ្ជាការកំពូល កងកម្លាំងពិសេស Quds របស់កងកម្លាំងឆ្មាំបដិវត្តឥស្លាមអ៊ីរ៉ង់ IRGC ឧត្តមសេនីយ៍ Qasem Soleimani បានបង្ហាញពី “ភេរវកម្មពីធម្មជាតិ” របស់អាមេរិក ដោយលោកបន្ថែមថាលោក ត្រាំ គឺជា “មនុស្សត្លុក” ។

យោងតាមសារព័ត៌មាន Sputnik ចេញផ្សាយនៅថ្ងៃទី២១ ខែមករា ឆ្នាំ២០២០ បានឱ្យដឹងដោយ យោងតាមការផ្សាយរបស់ទីភ្នាក់ងារសារព័ត៌មាន ISNA របស់អ៊ីរ៉ង់ថា សមាជិកសភាអ៊ីរ៉ង់ លោក Ahmad Hamzeh បានប្រកាសផ្តល់ប្រាក់សុទ្ធ ៣ លានដុល្លារ ដល់ជនណាដែលអាចសម្លាប់លោក ដូណាល់ ត្រាំ បាន ។

យោងតាមការផ្សាយនោះ គឺលោក Ahmad Hamzeh បានប្រាប់សមាជិកសភាថា “ក្នុងនាមប្រជាជននៃខេត្ត Kerman យើងនឹងបង់ប្រាក់រង្វាន់ចំនួន ៣លានដុល្លារ ជាថវិកាដល់អ្នកណាដែលសម្លាប់លោក ត្រាំ” ។ លោក Ahmad Hamzeh មិនបានបញ្ជាក់ច្បាស់ថា តើរង្វាន់ត្រូវបានអនុម័ត ដោយមេដឹកនាំបព្វជិតអ៊ីរ៉ង់ឬយ៉ាងណានោះទេ។

លោកក៏បានប្រាប់សភាថា ទីក្រុងតេរ៉ង់នឹងត្រូវបាន ការពារពីការគំរាមកំហែងប្រសិនបើខ្លួន មានអាវុធនុយក្លេអ៊ែរ។

សប្តាហ៍ដំបូងនៃខែមករា គេបានឃើញនូវភាពតានតឹង យ៉ាងខ្លាំងរវាងអាមេរិកនិងអ៊ីរ៉ង់ នៅពេលដែលប្រធានាធិបតីអាមេរិកលោក ដូណាល់ត្រាំ បានបញ្ជាឱ្យធ្វើឃាតមេបញ្ជាការ កងកម្លាំងពិសេស Quds លោក Soleimani ដែលជាឥស្សរជនអ៊ីរ៉ង់។

អ៊ីរ៉ង់បានសងសឹក ដោយបើកការវាយប្រហារ មីស៊ីលប្រឆាំងនឹងមូលដ្ឋានយោធាអាមេរិកពីរ នៅអ៊ីរ៉ាក់វិញផងដែរ៕

ប្រែសម្រួលៈ ណៃ តុលា

To Top