យូអិន៖ ក្រុមអ្នកជំនាញអង្គការ សហប្រជាជាតិ បានឲ្យដឹងនៅក្នុងរបាយការណ៍ថ្មី ដែលដកស្រង់ដោយ សារព័ត៌មានបរទេសកាលពីថ្ងៃសុក្រ ថាការនាំចូលផលិតផល ប្រេងចម្រាញ់របស់កូរ៉េខាងជើង បានកេីនលើសពី ដែនកំណត់ប្រចាំឆ្នាំ ដែលបានកំណត់ដោយ អង្គការសហប្រជាជាតិ រហូតដល់ ៨ ដងក្នុងរយៈពេល ១០ ខែដំបូងនៃឆ្នាំមុន។
របាយការណ៍ចំនួន ២៦៧ ទំព័រសម្រាប់គណៈកម្មាធិការ ដាក់ទណ្ឌកម្ម កូរ៉េខាងជើង របស់ក្រុមប្រឹក្សាសន្តិសុខ របស់អង្គការសហប្រជាជាតិ ក៏បានឲ្យដឹងផងដែរថា ប្រទេសកុម្មុយនិស្តមួយនេះ បានបន្តលើកកម្ពស់ កម្មវិធីនុយក្លេអ៊ែរ និងមីស៊ីលផ្លោងខុសច្បាប់ របស់ខ្លួន ដោយរំលោភ លើដំណោះស្រាយ របស់ក្រុមប្រឹក្សាសន្តិសុខ។
របាយការណ៍ប្រចាំឆ្នាំ របស់ក្រុមសមាជិកទាំង ៨ រូបបានគ្របដណ្តប់លើរយៈពេល ចាប់ពីថ្ងៃទី០៣ ខែសីហា ឆ្នាំ២០១៩ ដល់ថ្ងៃទី០៧ ខែកុម្ភៈ ឆ្នាំ២០២០ និងបានសង្ខេបការ រកឃើញរបស់រដ្ឋសមាជិក ក៏ដូចជាអ្នកជំនាញផងដែរ៕
ដោយ ឈូក បូរ៉ា
