វ៉ាស៊ីនតោន៖ ប្រធានាធិបតីលោក ដូណាល់ ត្រាំ បានលើកឡើងថា លោកនឹងដកសហរដ្ឋអាមេរិក ចេញពីសន្ធិសញ្ញា ត្រួតពិនិត្យអាវុធ ឆ្នាំ១៩៩២ ដែលបានអនុញ្ញាតឱ្យមានជើងហោះហើរ ឃ្លាំមើលគ្មានអាវុធលើទឹកដី ដែលចូលរួមដើម្បីកែលម្អតម្លាភាពនៃសកម្មភាពយោធា។
សន្ធិសញ្ញាបើកចំហដែនអាកាស បានចូលជាធរមានក្នុងឆ្នាំ ២០០២ ដោយមានការចូលរួមពីសមាជិកចំនួន ៣៤ រួមមានរុស្ស៊ី និងបណ្តាប្រទេសអឺរ៉ុបជាច្រើន។
សន្ធិសញ្ញានេះបាន ផ្តល់ឱកាសដល់ប្រទេស ជាសមាជិកក្នុងការទទួលបានព័ត៌មាន ស្តីពីសកម្មភាពយោធា និងសកម្មភាពដទៃទៀត ដែលមានការព្រួយបារម្ភ ប៉ុន្តែសហរដ្ឋអាមេរិកត្អូញត្អែរថា ទីក្រុងមូស្គូ បានរំលោភលក្ខខណ្ឌ របស់ខ្លួន។
លោកប្រធានាធិបតី ត្រាំ បានប្រាប់អ្នកយកព័ត៌មានថា “ខ្ញុំគិតថាយើងមានទំនាក់ទំនង ល្អជាមួយរុស្ស៊ី ប៉ុន្តែប្រទេសរុស្ស៊ី មិនបានគោរពតាមសន្ធិសញ្ញានេះទេ ដូច្នេះទាល់តែពួក គេប្រកាន់ខ្ជាប់ នោះយើងនឹងដកខ្លួនចេញ”៕
ដោយ ឈូក បូរ៉ា
