បរទេស៖ ប្រេសិតសហរដ្ឋអាមេរិកមួយរូប នៅថ្ងៃអង្គារនេះ តាមសេចក្តីរាយការណ៍ បានធ្វើដំណើរមកដល់ ប្រទេសកូរ៉េខាងត្បូង ក្នុងកិច្ចខិតខំប្រឹងប្រែងបង្កើត ឲ្យមានកិច្ចពិភាក្សានុយក្លេអ៊ែ ជាមួយកូរ៉េខាងជើងឡើងវិញ ក្រោយប៉ុន្មានម៉ោងបន្ទាប់ពី ទីក្រុងព្យុងយ៉ាងចេញ សេចក្តីថ្លែងការណ៍មួយថា គ្មានបំណងអង្គុយនិយាយគ្នា ជាមួយសហរដ្ឋអាមេរិក និងបានប្រាប់កូរ៉េខាងត្បូង ឲ្យឈប់ធ្វើការជ្រៀតជ្រែក។
អនុរដ្ឋមន្ត្រីការបរទេស សហរដ្ឋអាមេរិក លោក Stephen Biegun ដែលដឹកនាំកិច្ចពិភាក្សាលំដាប់ ការងារជាមួយមន្ត្រីកូរ៉េខាងជើង បានចុះនៅមូលដ្ឋានយោធា សហរដ្ឋអាមេរិកមួយកន្លែងស្ថិតនៅ ខាងត្បូងទីក្រុងសេអ៊ូល ហើយគ្រោងជួបគ្នា ជាមួយមន្ត្រីកូរ៉េខាងត្បូង នៅថ្ងៃពុធនិងថ្ងៃព្រហស្បតិ៍។
គួរបញ្ជាក់ថា នៅព្រឹកថ្ងៃអង្គារនេះ លោក Kwon Jong Gun ជាអគ្គនាយកទទួលបន្ទុក កិច្ចការនៅក្រសួងការបរទេសកូរ៉េខាងជើង បានចោទប្រកាន់ ប្រទេសកូរ៉េខាងត្បូង ពីបទបកស្រាយខុសចំពោះ សេចក្តីថ្លែងការណ៍កូរ៉េខាងជើងមួយ ដែលច្រានចោលពាក្យចចាម អារាមមិនសមហេតុផល ស្តីពីជំនួបកំពូលមួយផ្សេងទៀត រវាងមេដឹកនាំកូរ៉េខាងជើង លោក គីម ជុងអ៊ុន និងប្រធានាធិបតីសហរដ្ឋអាមេរិក លោក ដូណាល់ ត្រាំ៕
ប្រែសម្រួល៖ ប៉ាង កុង
