រដ្ឋមន្រ្តីហិរញ្ញវត្ថុថៃ លាលែងពីតំណែង ក្រោយបំពេញការងារបាន ២៦ថ្ងៃ

បរទេស៖ រដ្ឋមន្រ្តីហិរញ្ញវត្ថុប្រទេសថៃ គឺលោក Predee Daochai បានដាក់ពាក្យស្នើសុំលាលែងពីតំណែង បន្ទាប់ពីបានបំពេញការងាររយៈពេល ២៦ ថ្ងៃ ដោយលើកឡើង ពីមូលហេតុសុខភាព។

យោងតាមសារព័ត៌មាន Bangkok Post ចេញផ្សាយនៅថ្ងៃទី០១ ខែកញ្ញា ឆ្នាំ២០២០ បានឱ្យដឹងថា តាមសេចក្តីរាយការណ៍បានអោយដឹងថា អតីតប្រធានធនាគារ Kasikornbank រូបនេះ បានដាក់លិខិតលាលែងកាលពីថ្ងៃច័ន្ទ ហើយលោកនាយករដ្ឋមន្រ្តី ឧត្តមសេនីយ៍ ប្រាយុទ្ធ ចាន់អូចា ក៏បានយល់ព្រម។

លោក Predee ត្រូវបានតែងតាំងជាផ្លូវការនៅថ្ងៃទី ៦ ខែសីហា ក្រោមកូតារបស់នាយករដ្ឋមន្រ្តី។

យោងតាមសេចក្តីរាយការណ៍ របស់ប្រព័ន្ធផ្សព្វផ្សាយមុននេះបានឲ្យដឹងថា លោក Predee មិនយល់ស្របនឹងអនុប្រធាន របស់លោកគឺលោក Santi Prompat មកពីគណបក្ស Palang Pracharath (PPRP) ជុំវិញការរុះរើមន្រ្តីជាន់ខ្ពស់ជាពិសេស ដែលគួរតែជាប្រធាននាយកដ្ឋាន៕

ប្រែសម្រួលៈ ណៃ តុលា