បរទេស៖ របាយការណ៍បណ្តោះអាសន្នមួយ ដែលត្រូវបានចេញផ្សាយ នៅលើគេហទំព័រ វេជ្ជសាស្ត្រ medRxiv បានបង្ហាញថា ក្រុមហ៊ុនផលិតឱសថ និងវេជ្ជសាស្ត្រអាមេរិក Johnson and Johnson ត្រូវបានគេរាយការណ៍ថា បានបង្កើតវ៉ាក់សាំងមួយ ដែលក្នុងការពិសោធដំបូង បង្ហាញនូវភាពស៊ាំខ្លាំង ចំពោះវីរុសកូរ៉ូណា ក្នុងកម្រិតតែមួយ។
យោងតាមសារព័ត៌មាន Sputnik ចេញផ្សាយនៅថ្ងៃទី២៦ ខែកញ្ញា ឆ្នាំ២០២០ បានឱ្យដឹងថា របាយការណ៍នេះ បាននិយាយកាលពីថ្ងៃសុក្រថា « ទម្រង់សុវត្ថិភាព និងភាពស៊ាំនឹងមេរោគ បន្ទាប់ពីការប្រើតែមួយដង គឺអាចជួយ ដល់ការអភិវឌ្ឍ បន្ថែមនៃវ៉ាក់សាំង Ad26.COV2.S ក្នុងកម្រិត ៥x១០១០ vp ដែលជាវ៉ាក់សាំង ការពារ ដ៏មានសក្តានុពល ប្រឆាំងនឹងមេរោគកូវីដ ១៩ ។ ថ្នាំតែមួយដងនៃ Ad26.COV2.S បានផ្តល់ការឆ្លើយតប យ៉ាងខ្លាំង ចំពោះអ្នកទទួលវ៉ាក់សាំង ភាគច្រើន។
វ៉ាក់សាំង Johnson and Johnson គឺជាទីបួន នៅក្នុងសហរដ្ឋអាមេរិក ដែលបានចូលក្នុងដំណាក់កាលចុងក្រោយ នៃការសាកល្បងព្យាបាល។
ប្រធានាធិបតីអាមេរិក ដូ ណាល់ត្រាំ បានសន្យាថា វ៉ាក់សាំងចំនួន ១០០ លានដូសនឹងត្រូវចែកចាយ ទូទាំងសហរដ្ឋអាមេរិក នៅចុងឆ្នាំនេះ។ មុននេះលោក ត្រាំ បានអះអាងថាវ៉ាក់សាំងមួយ អាចមានសម្រាប់ ចែកចាយនៅសហរដ្ឋអាមេរិក មុនការបោះឆ្នោត ប្រធានាធិបតីថ្ងៃទី ៣ ខែវិច្ឆិកា ៕
ប្រែសម្រួលៈ ណៃ តុលា
