វ៉ាស៊ីនតោន៖ ប្រធានាធិបតីអាមេរិក ដូ ណាល់ត្រាំ បានចាកចេញយ៉ាងខ្លី ពីមន្ទីរពេទ្យយោធា ដែលជាកន្លែងដែលលោក កំពុងត្រូវបានគេព្យាបាលជំងឺកូវីដ-១៩ ក្នុងការជិះរថយន្ត កាលពីថ្ងៃអាទិត្យ ដើម្បីចេញស្វាគមន៍ដល់អ្នកគាំទ្រ ដែលប្រមូលផ្តុំគ្នានៅខាងក្រៅបង្កឱ្យ មានការរិះគន់ពីសហគមន៍ពេទ្យថា លោកកំពុងធ្វើឱ្យអ្នកដទៃមានគ្រោះថ្នាក់។
លោក ត្រាំ ត្រូវបានគេថតនៅលើវីដេអូគ្រវីពី កៅអីខាងក្រោយនៃរថយន្តប្រភេទ SUV ពណ៌ខ្មៅកាលពីល្ងាចថ្ងៃអាទិត្យ ដោយពាក់របាំងមុខ ខណៈដែលហ្វូងមនុស្សបានស្រែកហ៊ោ និងគ្រវីទង់ជាតិអាមេរិក និងបដាគាំទ្រនៅខាងក្រៅមជ្ឈមណ្ឌល វេជ្ជសាស្ត្រយោធាជាតិ Walter Reed នៅជាយក្រុង Washington តំបន់ Bethesda រដ្ឋ Maryland ។
អ្នកជំងឺដែលធ្វើតេស្តវិជ្ជមាន សម្រាប់ជំងឺកូវិដ-១៩ ជាទូទៅត្រូវបានគេដាក់ឱ្យនៅដាច់ពីគេរយៈពេល ១៤ ថ្ងៃ ដែលជារយៈពេលភ្ញាស់ ធម្មតាសម្រាប់មេរោគឆ្លង ដើម្បីចៀសវាងឆ្លងដល់អ្នកដទៃ ហើយជំងឺនេះបានសម្លាប់ ប្រជាជនអាមេរិកជាង ២០ម៉ឺននាក់ផងដែរ។
ប្រធានាធិបតីអាមេរិកលោក ដូណាល់ ត្រាំ បានធ្វើតេស្តវិជ្ជមាននៅថ្ងៃព្រហស្បតិ៍សប្ដាហ៍មុន ហើយមិនបានបង្ហាញពីការឆ្លង របស់លោកនោះទេរហូត ដល់ព្រឹកព្រលឹមនៃព្រឹកថ្ងៃសុក្រ ក្រោយមកលោកក៏ត្រូវបាន បញ្ជូនទៅមន្ទីរពេទ្យភ្លាមៗផងដែរ ដើម្បីទទួលការព្យាបាល ៕
ដោយ ឈូក បូរ៉ា
