សេអ៊ូល៖ អ្នកជំនាញបានឲ្យដឹងថា ការជ្រើសរើសបេក្ខជន ប្រធានាធិបតី នៃគណបក្សប្រជាធិបតេយ្យ អាមេរិកគឺលោក Joe Biden នឹងមានន័យថាជាសម្ព័ន្ធមិត្ត កាន់តែខ្លាំង ជាមួយប្រទេសកូរ៉េខាងត្បូង និងសម្ព័ន្ធមិត្តដទៃទៀត ប៉ុន្តែភាពតានតឹង ជាមួយប្រទេសកូរ៉េខាងជើង អាចនឹងកើនឡើង ពីព្រោះទីក្រុងព្យុងយ៉ាង អាចព្យាយាមសាកល្បង រដ្ឋបាលរបស់លោក។
លោក Gregg Brazinsky សាស្ត្រាចារ្យផ្នែកប្រវត្តិសាស្រ្ត និងកិច្ចការអន្តរជាតិ នៅសាកលវិទ្យាល័យ George Washington បានលើកឡើងថា“ ខ្ញុំគិតថាប្រសិនបើលោក Biden ត្រូវបានជាប់ឆ្នោត សម្ព័ន្ធមិត្តអាមេរិក ភាគច្រើន រួមទាំងកូរ៉េខាងត្បូង នឹងដកដង្ហើមធំបន្តិច។ លោកទំនងជានឹងប្រឹងប្រែង បន្ថែមទៀត ដើម្បីពង្រឹងសម្ព័ន្ធភាព របស់យើង” ។
ទីប្រឹក្សាគោលនយោបាយ ការបរទេសដ៏សំខាន់ម្នាក់ របស់លោក Biden គឺលោក Brian McKeon បានលើកឡើងថាបេក្ខជន ប្រជាធិបតេយ្យ នឹងស្វែងរកការជួសជុល សម្ព័ន្ធមិត្ត របស់ប្រទេសនេះឡើងវិញ និងបញ្ជាក់ ការប្តេជ្ញាចិត្ត របស់សហរដ្ឋអាមេរិក ក្នុងការធ្វើឲ្យប្រសើរឡើង នូវទំនាក់ទំនងជាមួយ សម្ព័ន្ធមិត្តរបស់ខ្លួន៕
ដោយ ឈូក បូរ៉ា
