បរទេស៖ រដ្ឋបាលរបស់លោក ត្រាំ នាពេលថ្មីៗនេះ តាមសេចក្តីរាយការណ៍ បានបន្ថែមប្រទេសនីហ្សេរីយ៉ា ចូលក្នុងបញ្ជីឈ្មោះប្រទេសបំពាន សេរីភាពសាសនាធ្ងន់ធ្ងរបំផុត លើពិភពលោក ដែលជាការបើកផ្លូវឲ្យ ប្រទេសនៅអាហ្វ្រិកមួយនេះ រងនូវវិធានការដាក់ពិន័យ។
ក្រសួងការបរទេសសហរដ្ឋអាមេរិក បានចាត់ទុកប្រទេសនីហ្សេរីយ៉ា ថាជាប្រទេសដ៏គួរឲ្យព្រួយបារម្ភខ្លាំងមួយ ជាលើកដំបូងនៅថ្ងៃចន្ទសប្ដាហ៍នេះ ក្រោមច្បាប់សេរីភាពសាសនាអន្តរជាតិឆ្នាំ១៩៩៨ ជាប់ពាក់ព័ន្ធទៅនឹងការរំលោភបំពាន ជាប្រព័ន្ធលើសេរីភាពសាសនា ដែលកំពុងតែបង្កកើតមាន។
យោងតាមសេចក្តីរាយការណ៍ពីកាសែត UPI ចេញផ្សាយនៅថ្ងៃទី០៨ ខែធ្នូ ឆ្នាំ២០២០ បានឲ្យដឹងថា សេចក្តីថ្លែងការណ៍មួយពី ក្រសួងការបរទេសអាមេរិក បាននិយាយថា ប្រទេសភូមា ចិន អេរីទ្រា អ៊ីរ៉ង់ កូរ៉េខាងជើង ប៉ាគីស្ថាន អារ៉ាប៊ីសាអូឌីត តាជីគីស្ថាន និងតួកម៉េនីស្ថាន ត្រូវបានចាត់សារជាថ្មីថា ជាប្រទេសដ៏គួរឲ្យព្រួយបារម្ភខ្លាំង៕
ប្រែសម្រួល៖ ប៉ាង កុង
