វ៉ាស៊ីនតោន៖ អនុរដ្ឋលេខាធិការសហរដ្ឋអាមេរិកលោក Stephen Biegun បានឲ្យដឹងថា ការទូតនៅតែជាដំណើរការល្អបំផុត និងតែមួយគត់ ដើម្បីដោះស្រាយបញ្ហា នុយក្លេអ៊ែរកូរ៉េខាងជើង ដោយអំពាវនាវឱ្យក្រុងព្យុងយ៉ាង វិលត្រឡប់មករកកិច្ចពិភាក្សាឡើងវិញ។
លោក Stephen Biegun ដែលក្នុងនាមជាប្រេសិតនុយក្លេអ៊ែរ កំពូលរបស់ទីក្រុងវ៉ាស៊ីនតោន បានធ្វើការកត់សម្គាល់ក្នុងពេល ធ្វើទស្សនកិច្ចមួយនៅទីក្រុងសេអ៊ូល ដោយលើកឡើងវិញនូវការចរចា ដែលមិនទាន់ចប់ជាយូរមក ហើយជាមួយកូរ៉េខាងជើង ដែលលោកបានកត់សម្គាល់ថា ជាការថយក្រោយ ការខកចិត្ត និងឱកាសខកខាន។
ក្នុងសុន្ទរកថានៅឯវិទ្យាស្ថាន ស្រាវជ្រាវមូលដ្ឋាន Asan សម្រាប់ការសិក្សាគោលនយោបាយ លោកបានលើកឡើងថា“ នៅពេលយើងក្រឡេកមើលទៅអនាគត ខ្ញុំនៅតែជឿជាក់ថា ការទូតនៅតែជាដំណើរដ៏ល្អបំផុត ហើយជាការពិតតែមួយគត់ ដើម្បីដោះស្រាយបញ្ហាប្រឈម របស់យើងជាមួយប្រទេសកូរ៉េខាងជើង” ។
លោកបានបន្ថែមថា “ក្រុងព្យុងយ៉ាង មានព្រឹត្តិការណ៍សំខាន់ៗមួយចំនួន ដែលនឹងកើតឡើងជាពិសេស សមាជគណបក្សលើកទី៨ នៅក្នុងខែមករា។ យើងលើកទឹកចិត្តយ៉ាងខ្លាំង ដល់ប្រទេសកូរ៉េខាងជើង ឱ្យប្រើពេលវេលារវាងពេលនេះ និងបន្ទាប់មក ដើម្បីកំណត់ផ្លូវសម្រាប់ការបន្តការទូត” ៕
ដោយ ឈូក បូរ៉ា
