ប៉ារីស៖ ប្រទេសហុងគ្រី និងស្លូវ៉ាគី បានចាប់ផ្តើមចាក់វ៉ាក់សាំងការពារប្រជាជនប្រឆាំងនឹងជំងឺកូវីដ-១៩ នៅថ្ងៃសៅរ៍ (ថ្ងៃទី ២៦ ធ្នូ) មួយថ្ងៃមុនការចេញលក់នៅក្នុងប្រទេសជាច្រើនទៀតរួមមានបារាំង និងអេស្បាញ ខណៈដែលការរាតត្បាតរីករាលដាលពាសពេញទ្វីប។
យោងតាមការចុះផ្សាយ របស់ទីភ្នាក់ងារសារព័ត៌មានសិង្ហបុរី បានឲ្យដឹងថា នៅប្រទេសអាល្លឺម៉ង់ មនុស្សមួយចំនួនតូចនៅផ្ទះថែទាំមនុស្សចាស់ ត្រូវបានគេចាក់ថ្នាំបង្ការ កាលពីថ្ងៃសៅរ៍ មួយថ្ងៃមុនពេលចាប់ផ្តើមយុទ្ធនាការ ចាក់វ៉ាក់សាំងជាផ្លូវការរបស់ប្រទេសនេះ។
ការចាក់ថ្នាំបង្ការរោគនៅទូទាំងសហភាពអឺរ៉ុប ដែលមានប្រជាជនជិត ៤៥០ លាននាក់ គឺជាជំហានដ៏សំខាន់មួយឆ្ពោះ ទៅរកការបញ្ចប់នូវជំងឺរាតត្បាត ដែលបានសម្លាប់មនុស្សជាង ១,៧ លាននាក់នៅជុំវិញពិភពលោក ដែលធ្វើឱ្យសេដ្ឋកិច្ចពិការ និងបំផ្លាញអាជីវកម្ម និងការងារ។
ប្រទេសហុងគ្រី បានចាក់វ៉ាក់សាំង ដែលត្រូវបានបង្កើតរួមគ្នាដោយ Pfizer និង BioNTech ដល់បុគ្គលិកជួរមុខ នៅមន្ទីរពេទ្យក្នុងទីក្រុង Budapest រដ្ឋធានី បន្ទាប់ពីទទួលបានការដឹកជញ្ជូនលើកដំបូងនូវបរិមាណគ្រប់គ្រាន់ ដើម្បីចាក់ដល់មនុស្សចំនួន ៤៨៧៥ នាក់។
ហុងគ្រីបានរាយការណ៍ករណីឆ្លងចំនួន ៣១៥,៣៦២ ករណីដែលមានមនុស្សស្លាប់ ៨,៩៥១ នាក់។ មនុស្សជាង ៦,០០០ នាក់កំពុងស្ថិតក្នុងមន្ទីរពេទ្យនៅឡើយជាមួយជំងឺកូវីដ-១៩ ដែលកំពុងធ្វើឱ្យប្រព័ន្ធថែទាំរបស់ប្រទេសអឺរ៉ុបកណ្តាល កំពុងរងការប៉ះពាល់៕
ដោយ ឈូក បូរ៉ា
