វៀនណា៖ អធិការបតីអូទ្រីស Sebastian Kurz បានអំពាវនាវឱ្យមានការចូលរួម ពីប្រទេសជប៉ុន និងរដ្ឋដែលមិនមែនជាប្រទេស ហត្ថលេខីផ្សេងទៀត នៅក្នុងកិច្ចប្រជុំលើកដំបូងនៃសន្ធិសញ្ញាអង្គការសហប្រជាជាតិ ជាប្រវត្តិសាស្ត្រ ដែលហាមឃាត់អាវុធនុយក្លេអ៊ែរ ដែលនឹងចូលជាធរមាន នៅថ្ងៃសុក្រខាងមុខនេះ។
នេះជាព្រឹត្តិការណ៍ប្រវត្តិសាស្ត្រ និងជាជំហានមួយដែលអ្នករិះគន់ អាវុធនុយក្លេអ៊ែរ ក៏ដូចជាហីបាស៊ូកា ដែលរងគ្រោះដោយសារការផ្ទុះគ្រាប់បែកបរមាណូ នៅហ៊ីរ៉ូស៊ីម៉ា និងណាហ្គាសាគី ក្នុងឆ្នាំ ១៩៤៥ បានប្រយុទ្ធគ្នាអស់រយៈពេលជាង ៧០ ឆ្នាំមកហើយ ។ លោក Kurz បានឲ្យដឹងនៅក្នុងបទសម្ភាសន៍ជាលាយលក្ខណ៍អក្សរជាមួយសារព័ត៌មានក្យូដូ។
អូទ្រីស បានដឹកនាំកិច្ចខិតខំប្រឹងប្រែង ដែលនាំឱ្យមានការអនុម័តសន្ធិសញ្ញា ស្តីពីការហាមឃាត់អាវុធនុយក្លេអ៊ែរនៅឆ្នាំ២០១៧ ដោយមានការគាំទ្រពី ១២២ ប្រទេស និងតំបន់។ វាជាកតិកាសញ្ញាអន្តរជាតិដំបូងបង្អស់ ដែលហាមឃាត់ការអភិវឌ្ឍ ការកាន់កាប់ និងការប្រើប្រាស់អាវុធនុយក្លេអ៊ែរ។
នៅក្នុងខែតុលាប្រទេសចំនួន ៥០ បានផ្តល់សច្ចាប័នលើសន្ធិសញ្ញានេះដែលឈានដល់កម្រិតមួយដែលតម្រូវឱ្យមានច្បាប់នេះចូលជាធរមាន។
ទោះយ៉ាងណារដ្ឋអាវុធនុយក្លេអ៊ែរ ដូចជាសហរដ្ឋអាមេរិក រុស្ស៊ី និងចិន ក៏មិនមែនជាផ្នែក របស់ខ្លួនដែរ ខណៈដែលជប៉ុន ក៏មិនបានចុះហត្ថលេខា លើកតិកាសញ្ញានេះ ក្នុងការពិចារណាលើសម្ព័ន្ធភាពសន្តិសុខ របស់ខ្លួនជាមួយសហរដ្ឋអាមេរិក ដែលផ្តល់ជំរក នៃឆ័ត្រនុយក្លេអ៊ែរ។ សន្ធិសញ្ញានេះចងភ្ជាប់តែរដ្ឋទាំងនោះ ដែលបានចុះហត្ថលេខា និងផ្តល់សច្ចាប័នជាផ្លូវការប៉ុណ្ណោះ ។
រដ្ឋទាំងអស់ក៏ដូចជាអង្គការ អន្តរជាតិពាក់ព័ន្ធ និងអង្គការសង្គមស៊ីវិល ត្រូវបានស្វាគមន៍ ក្នុងការចូលរួមជាអ្នកសង្កេតការណ៍ នៅក្នុងកិច្ចប្រជុំដំបូងនៃរដ្ឋភាគី” ចំពោះសន្ធិសញ្ញាដែលរំពឹងថា នឹងត្រូវធ្វើឡើងនៅទីក្រុង វីយែនក្នុងរយៈពេលមួយឆ្នាំចាប់ពីពេល ដែលកិច្ចព្រមព្រៀងនេះ ចូលជាធរមាន៕
ដោយ ឈូក បូរ៉ា
