បរទេស៖ សារព័ត៌មាន BBC បានផ្សាយនៅថ្ងៃទី១៤ ខែមីនា ឆ្នាំ២០២១ បានឱ្យដឹងថា ការតវ៉ានៅប្រទេសមីយ៉ាន់ម៉ា នៅថ្ងៃអាទិត្យ គឺបានបណ្តាលឱ្យបាតុករចំនួន ៥នាកស្លាប់ ហើយ BBC ផ្សាយជាភាសាភូមា និងសាក្សីដែលបានឃើញ ផ្ទាល់ភ្នែកបានអោយដឹងថា កាលពីថ្ងៃសៅរ៍មានបាតុករ ១២នាក់ ក៏បានស្លាប់ផងដែរ។
នៅក្នុងសុន្ទរកថា សាធារណៈលើកដំបូងរបស់លោក Mahn Win Khaing Than បាននិយាយថា “នេះគឺជាពេលវេលាដ៏ខ្មៅបំផុត របស់ប្រទេសជាតិ និងពេលវេលាដែលជិតភ្លឺ” ។ ពីកន្លែងលាក់ខ្លួនគាត់ដឹកនាំក្រុមអ្នកច្បាប់ ដែលបានបដិសេធមិនទទួល យករដ្ឋប្រហារកាលពីខែមុន។
ប្រព័ន្ធផ្សព្វផ្សាយក្នុងស្រុក និងវេជ្ជបណ្ឌិតម្នាក់ ដែលត្រូវបានដកស្រង់សម្តី ដោយទីភ្នាក់ងារសារព័ត៌មាន AFP បានរាយការណ៍ថា យុវជនម្នាក់ត្រូវបានបាញ់សម្លាប់ ដោយកងកំលាំងសន្តិសុខ នៅភាគខាងជើងទីក្រុង Hpakant ហើយបើយោងតាមអ្នកយកព័ត៌មាន និងសាក្សីក្នុងស្រុកបានអោយដឹងថា យុវជនម្នាក់ទៀតត្រូវបានសម្លាប់នៅទីក្រុង Bago នៅជិតទីក្រុងយ៉ាំងហ្គោន។ ចំណែក អ្នកតវ៉ា ៣ នាក់ត្រូវបានសម្លាប់នៅក្នុងការប៉ះទង្គិចគ្នា នៅទីក្រុងយ៉ាំងហ្គោន ៕
ប្រែសម្រួលៈ ណៃ តុលា
