បរទេស៖ ក្រុមហ៊ុន Pfizer និយាយថាការសាកល្បង វ៉ាក់សាំងបង្ការជំងឺកូវីដ១៩ របស់ខ្លួនទៅលើកុមារដែលមានអាយុពី ១២ ឆ្នាំ ទៅ ១៥ ឆ្នាំបង្ហាញពីប្រសិទ្ធភាព ១០០% និងការឆ្លើយតបភាពស៊ាំខ្លាំង។
យោងតាមសារព័ត៌មាន BBC ចេញផ្សាយនៅយប់ថ្ងៃទី៣១ ខែមីនា ឆ្នាំ២០២១ បានឱ្យដឹងថា លទ្ធផលដំបូងនៃការសាកល្បង លើមនុស្សវ័យជំទង់ចំនួន ២ ២៦០នាក់ នៅសហរដ្ឋអាមេរិក ក៏បានបង្ហាញថា វ៉ាក់សាំងនេះមានសុវត្ថិភាព ដោយមិនមានផលប៉ះពាល់អ្វីប្លែកនោះទេ។
![](https://dap-news.com/wp-content/uploads/2021/04/photo_2021-04-01_11-13-34-1024x658.jpg)
ក្រុមហ៊ុនផលិតឱសថនេះនិយាយថា ខ្លួននឹងបញ្ជូនទិន្នន័យរបស់ខ្លួនទៅអាជ្ញាធរអាមេរិក និងអឺរ៉ុប ដើម្បីប្រើប្រាស់ជាបន្ទាន់ទៅលើក្មេងអាយុពី ១២ ទៅ ១៥ ឆ្នាំ។ បច្ចុប្បន្ននេះ មិនមានផែនការសម្រាប់កុមារ ដែលត្រូវចាក់វ៉ាក់សាំង នៅក្នុងចក្រភពអង់គ្លេសទេ។
ហានិភ័យរបស់កុមារ ក្នុងការធ្លាក់ខ្លួនឈឺខ្លាំង ឬរហូតដល់ស្លាប់ជាមួយនឹងវីរុសកូវីដ១៩ គឺនៅតិចតួច ហើយនៅទូទាំងរោគរាតត្បាត គឺពួកគេកម្រត្រូវការការព្យាបាល នៅមន្ទីរពេទ្យណាស់។ ចំណែកមនុស្សពេញវ័យ ជាពិសេសអ្នកដែលមានអាយុលើសពី ៥០ឆ្នាំ និងអ្នកដែលមានបញ្ហាសុខភាពធ្ងន់ធ្ងរ មានហានិភ័យខ្ពស់ ដែលជាមូលហេតុដែលពួកគេ ត្រូវបានចាក់វ៉ាក់សាំងជាអាទិភាព នៅក្នុងចក្រភពអង់គ្លេស ៕
ប្រែសម្រួលៈ ណៃ តុលា
![](https://dap-news.com/wp-content/uploads/2020/08/1-1.png)