តេអេរ៉ង់៖ រដ្ឋមន្ត្រីការបរទេសអ៊ីរ៉ង់លោក Mohammad Javad Zarif បានអំពាវនាវដល់អ្នកចូលរួមពីប្លុក អឺរ៉ុបក្នុងកិច្ចព្រមព្រៀង នុយក្លេអ៊ែរឆ្នាំ២០១៥ ដើម្បីរក្សាឥរិយាបថស្ថាបនា ក្នុងកិច្ចប្រជុំដែលគ្រោងធ្វើនៅថ្ងៃទី៦ ខែមេសា នៅទីក្រុងវីយែន។
គេហទំព័រផ្លូវការរបស់ក្រសួងការបរទេសអ៊ីរ៉ង់បានរាយការណ៍កាលពីថ្ងៃអាទិត្យថា លោកហ្សារីហ្វ បានធ្វើការទាមទារនៅថ្ងៃសៅរ៍ក្នុងការសន្ទនាតាមទូរស័ព្ទជាមួយសមភាគីអង់គ្លេសរបស់លោក គឺលោក Dominic Raab តាមការចង់បានខាងលើនេះ។
យោងតាមរបាយការណ៍របស់អ្នកការទូតទាំងពីរបានពិភាក្សាអំពីការវិវឌ្ឍន៍ចុងក្រោយដែលទាក់ទងទៅនឹងផែនការសកម្មភាពរួម (JCPOA) នៅក្នុងការអំពាវនាវ ដែលបានធ្វើឡើងតាមការស្នើសុំរបស់ភាគីអង់គ្លេស។
លោកហ្សារីហ្វ បានបញ្ជាក់ជាថ្មីនូវជំហររបស់ទីក្រុងតេអេរ៉ង់ថា អ៊ីរ៉ង់នឹងវិលត្រឡប់ទៅរកកាតព្វកិច្ច JCPOA របស់ខ្លួន បន្ទាប់ពីការដាក់ទណ្ឌកម្ម “ខុសច្បាប់ និងអយុត្តិធម៌” ដែលបានដាក់ដោយសហរដ្ឋអាមេរិក ត្រូវបានដកចេញ និងផ្ទៀងផ្ទាត់ដោយអ៊ីរ៉ង់ទាំងស្រុង។
យោងតាមប្រភពពីអ៊ីរ៉ង់ អ្នកការទូតអង់គ្លេសរូបនេះ បានលើកឡើងថា ប្រទេសរបស់លោក នឹងខិតខំប្រឹងប្រែងសម្រាប់ការចរចា ដើម្បីទទួលបានផ្លែផ្កា នៅក្នុងកិច្ចព្រមព្រៀងនុយក្លេអ៊ែរដែលកំពុងជាប់គាំងមួយនេះ។
ភាគីនៃកិច្ចព្រមព្រៀងនុយក្លេអ៊ែរអ៊ីរ៉ង់ បានយល់ព្រមកោះប្រជុំនៅប្រទេសអូទ្រីស កាលពីថ្ងៃអង្គារ ដើម្បីពិភាក្សារកវិធី ដើម្បីនាំកិច្ចព្រមព្រៀងនេះឱ្យមានជីវិតឡើងវិញ និងដើម្បីឲ្យអាមេរិក វិលចូលកិច្ចព្រមព្រៀងនេះវិញយ៉ាងពេញលេញ។
អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បានបញ្ជាក់កាលពីថ្ងៃសុក្រថាតំណាងទីក្រុងវ៉ាស៊ីនតោន នឹងចូលរួមការជួបគ្នានៅទីក្រុងវីយែន ហើយបានលើកឡើងថា ប្រទេសនេះនៅតែបើកចំហ ចំពោះការចរចាដោយផ្ទាល់ជាមួយអ៊ីរ៉ង់៕
ដោយ ឈូក បូរ៉ា
