ប៉េកាំង៖ ប្រេសិតចិន បានជំរុញឱ្យសហរដ្ឋអាមេរិក ដកទណ្ឌកម្មខុសច្បាប់ទាំងអស់ប្រឆាំងនឹងអ៊ីរ៉ង់ របស់ខ្លួនប្រឆាំងនឹងអង្គភាព និងបុគ្គលភាគីទី៣ រួមទាំងប្រទេសចិន ផងដែរនៅពេលកិច្ចចរចា កិច្ចព្រមព្រៀងនុយក្លេអ៊ែរអ៊ីរ៉ង់ បានបន្តឡើងវិញ នៅទីក្រុងវីយែន។
អ្នកការទូតជាន់ខ្ពស់មកពីប្រទេសចិន បារាំង អាល្លឺម៉ង់ រុស្ស៊ី អង់គ្លេស និងអ៊ីរ៉ង់ បានជួបគ្នានៅក្នុងកិច្ចប្រជុំបិទទ្វារ នៃសណ្ឋាគារហ្គ្រេនវ៉េន។ កំពូលនៃរបៀបវារៈ គឺការដកទណ្ឌកម្មលើអ៊ីរ៉ង់ និងវិធានការអនុវត្ត កិច្ចព្រមព្រៀងនុយក្លេអ៊ែរ។
កិច្ចប្រជុំគណៈកម្មការចម្រុះ នៃផែនការសកម្មភាពរួម (JCPOA) ដែលត្រូវបានគេស្គាល់ថា ជាកិច្ចព្រមព្រៀងនុយក្លេអ៊ែរអ៊ីរ៉ង់ បានទាក់ទាញការចាប់អារម្មណ៍ ពីសំណាក់សាធារណជន ដោយសារតែអ្នកតំណាងមកពី សហរដ្ឋអាមេរិកកំពុងនៅទីក្រុងវីយែន ដើម្បីជួយសង្គ្រោះកិច្ចព្រមព្រៀងនេះ។
លោក វ៉ាង គុន ប្រេសិតចិនប្រចាំនៅ អង្គការសហប្រជាជាតិ និងអង្គការអន្តរជាតិផ្សេងទៀត នៅទីក្រុងវីយែន បានលើកឡើងថា សហរដ្ឋអាមេរិក គួរតែដកទណ្ឌកម្មខុសច្បាប់ទាំងអស់ ប្រឆាំងនឹងទីក្រុងតេអេរ៉ង់ ហើយភាគីអ៊ីរ៉ង់គួរតែបន្តការអនុលោម តាមកិច្ចព្រមព្រៀងនុយក្លេអ៊ែរឆ្នាំ២០១៥ ដោយឈរលើមូលដ្ឋាននោះ។
លោកវ៉ាង បានបន្ដថា សហរដ្ឋអាមេរិកដកខ្លួនចេញពីកិច្ចព្រមព្រៀង និងដាក់សម្ពាធអតិបរិមា របស់ខ្លួនប្រឆាំងនឹងអ៊ីរ៉ង់ គឺជាដើមហេតុនៃស្ថានភាពបច្ចុប្បន្ន ដូច្នេះការវិលត្រឡប់ឆាប់ៗ របស់សហរដ្ឋអាមេរិក ទៅនឹងកិច្ចព្រមព្រៀង គឺជាគន្លឹះក្នុងការបង្ក្រាបបញ្ហា។
លោកបន្ថែមថា “សំណើត្រឹមត្រូវរបស់ភាគី ដែលរងរបួសជាជាងភាគីល្មើស គួរតែត្រូវបានបញ្ជាក់និងពេញចិត្តជាមុនសិន។ នេះជាសំណួរមូលដ្ឋានត្រឹមត្រូវ ឬខុស។ សហរដ្ឋអាមេរិក គួរតែដកទណ្ឌកម្មទាំងអស់ ប្រឆាំងនឹងទីក្រុងតេរ៉ង់ ហើយផ្អែកលើមូលដ្ឋាននេះ អ៊ីរ៉ង់អាចចាប់ផ្តើមឡើងវិញ នូវការអនុលោមតាមកិច្ចព្រមព្រៀងនុយក្លេអ៊ែរ ៕
ដោយ ឈូក បូរ៉ា
