បរទេស៖ អ្នកនាំពាក្យ អង្គការសហប្រជាជាតិ លោក Stephane Dujarric បាននិយាយនៅក្នុង សន្និសីទសារព័ត៌មានមួយថា យ៉ាងហោចណាស់អ្នកកាសែត ៧១ នាក់ត្រូវបានចាប់ខ្លួន ដោយអាជ្ញាធរមីយ៉ាន់ម៉ា ចាប់តាំងពីរដ្ឋប្រហារយោធា នៅក្នុងខែកុម្ភៈ។
យោងតាមសារព័ត៌មាន Sputnik ចេញផ្សាយនៅថ្ងៃទី១៥ ខែមេសា ឆ្នាំ២០២១ បានឱ្យដឹងដោយផ្អែកតាម ការលើកឡើង របស់លោក Dujarric ថា “ ពីប្រទេសមីយ៉ាន់ម៉ាសហសេវិក របស់យើងនៅអង្គការ UNESCO បាននិយាយថា អ្នកកាសែត ៧១ នាក់ត្រូវបានចាប់ខ្លួន ហើយជាងពាក់កណ្តាល នៃអ្នកដែលចាប់ខ្លួនទាំងនោះ នៅតែត្រូវបានឃុំខ្លួន ចាប់តាំងពីដើមខែកុម្ភៈ” ។
លោកបន្តថា មនុស្សប្រមាណ ២៤ នាក់ត្រូវបានចោទប្រកាន់ ពីបទផ្សព្វផ្សាយព័ត៌មានក្លែងក្លាយ។
អ្នកនាំពាក្យរូបនេះបានបន្ថែមថា“ ក្រុមរបស់យើង នៅមានការព្រួយបារម្ភយ៉ាងខ្លាំង អំពីស្ថានភាពរបស់អ្នកកាសែត ក៏ដូចជាប្រជាជន រាប់ពាន់នាក់ ដែលត្រូវបានចាប់ខ្លួន តាមអំពើចិត្តដោយមានមនុស្ស ជាច្រើនបានបាត់ខ្លួន ដោយបង្ខំ”៕
ប្រែសម្រួលៈ ណៃ តុលា
