បរទេស៖ ទូរទស្សន៍ BBC ចេញផ្សាយនៅថ្ងៃពុធនេះបានឲ្យដឹងថា នាវាមុជទឹកមួយរបស់ប្រទេសឥណ្ឌូនេស៊ី បានបាត់ខ្លួនចេញពីរ៉ាដា ជាមួយនឹងនាវិកសរុប ៥៣នាក់ នៅលើនោះផងដែរត្រង់ចំណុចភាគខាងជើង នៃកោះបាលី។
នាវាមុជទឹកត្រូវបានគេដឹងថា កំពុងធ្វើប្រតិបត្តិការហ្វឹកហាត់យោធា នៅថ្ងៃពុធ ប៉ុន្តែបែរជាមិនអាចត្រឡប់មកវិញ ឬសូម្បីតែទំនាក់ទំនងមកមូលដ្ឋានវិញ ក្រោយបញ្ចប់នៃការធ្វើហ្វឹកហាត់រួចរាល់
ហើយនោះ។
មេបញ្ជាការយោធាឥណ្ឌូនេស៊ី បាននិយាយថា នាវាចម្បាំងជាច្រើនត្រូវបានដាក់ពង្រាយ ដើម្បីធ្វើការស្រាវជ្រាវរកនាវាមុជទឹក ដែលមានឈ្មោះថា KRI Nanggala-402 ដោយក្នុងនោះរដ្ឋាភិបាលក៏កំពុងស្នើសុំឲ្យអជ្ញាធរ នៃប្រទេសអូស្ត្រាលី និងសិង្ហបុរីក្នុងការជួយស្វែងរកផងដែរ។
នាវាមុជទឹកដែលធ្វើឡើង នៅក្នុងប្រទេសអាល្លឺម៉ង់ ត្រូវបានគេដឹងថា បានបាត់ខ្លួននៅក្នុងត្រង់ចំណុចប្រមាណជា ៩៦គីឡូម៉ែត្រ ពីឆ្នេរនៃកោះបាលីហើយជឿជាក់ថា ពេលបាត់ខ្លួននាវានេះកំពុងដំណើរការនៅក្នុងជម្រៅទឹកដ៏ជ្រៅមួយ ៕
ប្រែសម្រួល៖ ស៊ុន លី
