បរទេស៖ រដ្ឋមន្ត្រីការបរទេសអាមេរិក លោក Antony Blinken បានអំពាវនាវឲ្យប្រទេសកូរ៉េខាងជើង វិលត្រឡប់ចូលតុចរចាវិញ ក្នុងខណៈលោកជួបជាមួយសមភាគីនានា នៅកិច្ចប្រជុំកំពូល G7 សម្រាប់រដ្ឋមន្ត្រីការបរទេស នៅក្នុងទីក្រុងឡុងដ៍ នាសប្ដាហ៍នេះ។
យោងតាមសេចក្តីរាយការណ៍មួយ ចេញផ្សាយដោយទីភ្នាក់ងារសារព័ត៌មាន UPI បានឲ្យដឹងថា ការថ្លែងបែបនេះរបស់ លោករដ្ឋមន្ត្រីការបរទេសអាមេរិករូបនេះ គឺត្រូវបានធ្វើឡើង ក្រោយទីក្រុងវ៉ាស៊ីនតោនធ្វើការប្រកាសថា ខ្លួនទើបបានបញ្ចប់ការពិចារណា លើគោលនយោបាយកូរ៉េខាងជើង កាលពីសប្ដាហ៍មុន។
នៅក្នុងសន្នសីទកាសែតរួមគ្នាមួយ ជាមួយរដ្ឋមន្ត្រីការបរទេសអង់គ្លេស លោក Dominic Raab នោះ លោក Antony Blinken បានមានប្រសាសន៍យ៉ាងដូច្នេះថា “ខ្ញុំសង្ឃឹមថា ប្រទេសកូរ៉េខាងជើងនឹងចាប់យក ឱកាសជួបគ្នាតាមរយៈការទូត និងដើម្បីឃើញថា មានផ្លូវឆ្ពោះទៅរកគោលដៅ បំបាត់នុយក្លេអ៊ែទាំងស្រុង នៅលើឧបទ្វីបកូរ៉េ”។
លោកបានបន្ថែមថា “យើងមិនត្រឹមតែសម្លឹងមើល នូវអ្វីដែលកូរ៉េខាងជើងនិយាយទេ ប៉ុន្តែព្រមទាំងអ្វីដែលវាធ្វើពិតប្រាកដ នៅក្នុងរយៈពេលប៉ុន្មានថ្ងៃនិងខែខាងមុខ។ ប៉ុន្តែយើងមានគោលនយោបាយ យ៉ាងច្បាស់លាស់ ដែលផ្តោតលើកិច្ចការការទូត ហើយវាអាស្រ័យលើកូរ៉េខាងជើង ត្រូវសម្រេចចិត្តថា ខ្លួនចង់ជួបគ្នា ឬមិនជួបនៅតុចរចា” ៕
ប្រែសម្រួល៖ ប៉ាង កុង
