តៃប៉ិ៖ ប្រធានាធិបតីតៃវ៉ាន់លោកស្រី Tsai Ing-wen បានឲ្យដឹងកាលពីថ្ងៃអង្គារថា រដ្ឋាភិបាលរបស់លោកស្រីសង្ឃឹមថា នឹងអាចផ្តល់វ៉ាក់សាំងបង្កា ជំងឺកូវីដ-១៩ ដែលត្រូវបានអភិវឌ្ឍ ក្នុងស្រុកដំបូងបំផុត ប្រឆាំងនឹងវីរុសនេះ នៅចុងខែកក្កដា នេះបើយោងតាមការចុះផ្សាយ របស់ទីភ្នាក់ងារ សារព័ត៌មានក្យូដូជប៉ុន។
បន្ទាប់ពីបានទៅមជ្ឈមណ្ឌល បញ្ជាការជំងឺរាតត្បាតកណ្តាល ដែលមានយុត្តាធិការ លើការត្រួតពិនិត្យជំងឺកូវីដ-១៩ លោកស្រី Tsai បានលើកឡើងថា ការអភិវឌ្ឍន៍វ៉ាក់សាំង គឺស្ថិតនៅក្នុង ដំណាក់កាលចុងក្រោយ នៃការសាកល្បងគ្លីនិកហើយថា“ រដ្ឋាភិបាលនឹងពិនិត្យគុណភាព និងសុវត្ថិភាព” ។
កោះតៃវ៉ាន់កំពុងប្រយុទ្ធប្រឆាំង នឹងការផ្ទុះឡើងនូវមេរោគ ដ៏សាហាវបំផុតរបស់ខ្លួន ចាប់តាំងពីមានការរាតត្បាត ដោយមានករណីឆ្លងជាង ១,០០០ករណី ក្នុងសហគមន៍ ដែលត្រូវបានរាយការណ៍ នៅក្នុងសប្តាហ៍មុន។
លោកស្រី Tsai ព្យាយាមកាត់បន្ថយ ការព្រួយបារម្ភ របស់សាធារណៈជន និងបន្តទទួលបានការគាំទ្រ និងកិច្ចសហប្រតិបត្តិការ សម្រាប់វិធានការបង្ការ ការរីករាលដាលរបស់រដ្ឋាភិបាល ដោយបញ្ជាក់យ៉ាងច្បាស់ អំពីចក្ខុវិស័យ សម្រាប់ការចាក់វ៉ាក់សាំង។
ជាមួយគ្នានេះក្រសួងអប់រំ បានប្រកាសថា សាលារៀនទាំងអស់ រួមទាំងសាលាមតេយ្យ និងសាកលវិទ្យាល័យ នឹងផ្អាកថ្នាក់រៀនទល់មុខ ហើយប្តូរទៅរៀនតាមអ៊ិនធឺណិតវិញ ចាប់ពីថ្ងៃពុធរហូត ដល់ថ្ងៃទី២៨ ខែឧសភា។
អាជ្ញាធរសុខាភិបាល បានរាយការណ៍ថា មានអ្នកឆ្លងថ្មីចំនួន ២៤៥ នាក់ កាលពីថ្ងៃអង្គារ ក្នុងនោះ ២៤០ នាក់ត្រូវបានចាត់ថ្នាក់ថា ជាការឆ្លងជំងឺក្នុងស្រុក ហើយចំនួន នៃការបង្ករោគបែបនេះ មាននៅក្នុងខ្ទង់បីដង ក្នុងរយៈពេល ៤ថ្ងៃជាប់ៗគ្នា៕ ដោយ៖ ឈូក បូរ៉ា
