តូក្យូ៖ នាយករដ្ឋមន្រ្តីជប៉ុនលោក Yoshihide Suga និងបណ្ដាមេដឹកនាំ សហគមន៍អ៊ឺរ៉ុប បានអំពាវនាវឱ្យមានសន្តិភាព និងស្ថិរភាពនៅទូទាំង ច្រកសមុទ្រតៃវ៉ាន់ នៅថ្ងៃព្រហស្បតិ៍ម្សិលមិញនេះ នៅពេលដែលចិនដីគោក បង្កើនសម្ពាធលើកោះ ដែលគ្រប់គ្រង ដោយខ្លួនឯងមួយនេះ។
នៅក្នុងសេចក្តីថ្លែងការណ៍រួម បន្ទាប់ពីសន្និសីទនិម្មិតរបស់ពួកគេ ប្រធានក្រុមប្រឹក្សាអឺរ៉ុបលោក Charles Michel និងប្រធានគណៈកម្មការអឺរ៉ុប លោក Ursula von der Leyen បានចូលរួមជាមួយលោក Suga ក្នុងការជំរុញឱ្យមានដំណោះស្រាយ ដោយសន្តិវិធីនៃបញ្ហា ឆ្លងកាត់ច្រកសមុទ្រ “ខណៈពេលប្តេជ្ញា បង្កើនកិច្ចសហប្រតិបត្តិការ សម្រាប់តំបន់ឥណ្ឌូ – ប៉ាស៊ីហ្វិកដោយសេរី និងបើកចំហ។
យោងតាមមន្រ្តី ក្រសួងការបរទេសជប៉ុន បានឲ្យដឹងថា វាគឺជាឯកសារយោងដំបូងបង្អស់ ដែលមិនធ្លាប់មាន ចំពោះកោះតៃវ៉ាន់ នៅក្នុងសេចក្តីថ្លែងការណ៍ រួមរវាងជប៉ុន – អ៊ឺរ៉ុប ដោយប្រើភាសាដូចគ្នា ទៅនឹងសេចក្តីថ្លែងការណ៍ ដែលត្រូវបានចេញផ្សាយ បន្ទាប់ពីកិច្ចប្រជុំរបស់លោក នាយករដ្ឋមន្រ្តីជប៉ុន ជាមួយប្រធានាធិបតីអាមេរិក លោក ចូ បៃដិន កាលពីខែមុន។
លោក Suga និងមេដឹកនាំសហភាពអឺរ៉ុប បានសម្តែងការព្រួយបារម្ភយ៉ាងខ្លាំង អំពីស្ថានភាពនៅក្នុងដែនទឹក ជុំវិញប្រទេសចិន និងបានលើកឡើងជារួមថា ភាគីទាំងអស់ប្រឆាំងដាច់ខាត រាល់ការប៉ុនប៉ងជាឯកតោភាគី ដើម្បីផ្លាស់ប្តូរស្ថានភាពបច្ចុប្បន្ន និងបង្កើនភាពតានតឹង។
រដ្ឋាភិបាលក្រុងប៉េកាំង បានបង្កើនការទាមទាររបស់ខ្លួន ចំពោះកោះសេនកាគូ ដែលគ្រប់គ្រងដោយជប៉ុន នៅសមុទ្រចិនខាងកើត ដោយបញ្ជូននាវាយាមសមុទ្រ ទៅដែនទឹកក្បែរនោះ នៅក្នុងអ្វីដែលទីក្រុងតូក្យូ មើលឃើញថា ជាការប៉ុនប៉ងដើម្បីគ្រប់គ្រង។
ប្រទេសចិន ក៏បានបន្តធ្វើនយោបាយនីយកម្ម នៃកោះសិប្បនិម្មិត នៅសមុទ្រចិនខាងត្បូង ជាទីដែលប្រទេសចិន បានទាមទារអធិបតេយ្យភាពត្រួតស៊ីគ្នា ជាមួយប្រទេសជិតខាងនៅអាស៊ី។
សហគមន៍អ៊ឺរ៉ុប កំពុងព្យាយាមដើរតួនាទី កាន់តែធំនៅក្នុងតំបន់ឥណ្ឌូ – ប៉ាស៊ីហ្វិក ដោយយកយុទ្ធសាស្ត្រមួយ កាលពីខែមុន សម្រាប់កិច្ចសហប្រតិបត្តិការ ជាមួយដៃគូក្នុងតំបន់។
នៅក្នុងនោះដែរលោក Michel និងលោក von der Leyen បានបង្ហាញការគាំទ្រ ចំពោះការរៀបចំព្រឹត្តិការណ៍ កីឡាអូឡាំពិកទីក្រុងតូក្យូ នៅរដូវក្តៅនេះ ក្នុងលក្ខណៈ“ សុវត្ថិភាព” ទោះបីជាមានការព្រួយបារម្ភ អំពីការប្រកួត ដែលនឹងកើតឡើង ក្នុងកំឡុងពេលមានការរាតត្បាត ជាសកលក៏ដោយ៕ ដោយ៖ ឈូក បូរ៉ា
