បរទេស៖ កងទ័ពជើងទឹកសហរដ្ឋអាមេរិក តាមសេចក្តីរាយការណ៍ បានប្រកាសថា សហរដ្ឋអាមេរិកបានបញ្ជូន នាវាផ្ទុកយន្តហោះមួយគ្រឿង ទៅកាន់ដែនសមុទ្រចិនខាងត្បូង ដើម្បីធ្វើប្រតិបត្តិការសន្តិសុខ ដែនសមុទ្រជាំមួយសម្ពន្ធមិត្ត។
តាមការចេញផ្សាយរបស់ ទីភ្នាក់ងារសារព័ត៌មាន UPI បានឲ្យដឹងថា ក្រុមវាយប្រហាររបស់នាវាផ្ទុកយន្តហោះ Ronald Reagan ត្រូវបានគេបញ្ជូនទៅកាន់តំបន់ នៃកងនាវាលេខ៧របស់អាមេរិក កាលពីថ្ងៃចន្ទ ដើម្បីគាំទ្រដល់ការធ្វើដំណើរ និងប្រតិបត្តិការដោយសេរី នៅក្នុងតំបន់ឥណ្ឌូ-ប៉ាស៊ីហ្វិក។
នៅក្នុងសេចក្តីប្រកាសព័ត៌មានមួយ កងទ័ពជើងទឹកសហរដ្ឋអាមេរិក បាននិយាយថា សកម្មភាពនោះ គឺស្ថិតនៅក្នុងកិច្ចសហប្រតិបត្តិការជាមួយសម្ពន្ធមិត្ត និងដៃគូដែលមានចិត្តដូចគ្នានានា ដើម្បីរក្សាបទបញ្ជាអន្តរជាតិ នៅដែនសមុទ្រចិនខាងត្បូង។
ក្រុមវាយប្រហាររបស់នាវាផ្ទុកយន្តហោះ Ronald Reagan កាលពីខែឧសភា បានធ្វើដំណើរចេញពីកំពង់ផែ របស់ខ្លួននៅមូលដ្ឋានទ័ពជើងទឹក Yokosuka ក្នុងប្រទេសជប៉ុន នៅមុនពេលធ្វើសមយុទ្ធជាមួយ កងកម្លាំងការពារដែនសមុទ្ររបស់ប្រទេសជប៉ុន ៕
ប្រែសម្រួល៖ ប៉ាង កុង
