ថៃ ចំណាយទឹកប្រាក់ ២៣៥លានដុល្លារ ផ្ដល់ជំនួយ សម្រាប់បុគ្គលិក រងផលប៉ះពាល់ដោយ ការរឹតត្បិត ១ខែទៀត

បាងកក៖ មន្ត្រីរដ្ឋាភិបាលម្នាក់បានឲ្យដឹងថាបុគ្គលិកថៃ ដែលរងផលប៉ះពាល់ដោយការហាមឃាត់រយៈពេលមួយខែ នៅភោជនីយដ្ឋាន និងការដ្ឋានសំណង់ នឹងទទួលបានប្រាក់ចំនួន ២០០០ បាត (ប្រហែល ៦២,៣០ ដុល្លារសហរដ្ឋអាមេរិក) ជាសំណងបន្ថែម។

អ្នកនាំពាក្យរដ្ឋាភិបាលថៃលោក Anucha Burapachaisri បានឲ្យដឹងកាលពីថ្ងៃអង្គារថានិយោជិក ដែលរងផលប៉ះពាល់នឹងទទួលបានសំណងពាក់កណ្តាលប្រាក់ឈ្នួល ដែលស្មើនឹងពាក់កណ្តាលនៃប្រាក់ខែរបស់ពួកគេ ហើយនិងបន្ថែមចំនួន ២,០០០ បាតបន្ថែមទៀត។

រដ្ឋាភិបាលថៃ បានត្រៀមថវិកាប្រមាណ ៧,៥ ពាន់លានបាត (ប្រហែល ២៣៥ លានដុល្លារអាមេរិក) ដើម្បីចំណាយលើការចំណាយបែបនេះក្នុងការគាំទ្រដល់បុគ្គលិកទាំងនេះ។

លោកបានលើកឡើងថា បុគ្គលិកជាង ៦៩ ម៉ឺននាក់ ដែលត្រូវបានគ្របដណ្តប់ដោយសន្តិសុខសង្គមនឹងទទួលបានអត្ថប្រយោជន៍ពីកញ្ចប់ជំនួយសង្គ្រោះរបស់រដ្ឋាភិបាល។

ទោះយ៉ាងណានិយោជិក ដែលគ្មានការធានារ៉ាប់រងសន្តិសុខសង្គម នឹងមិនត្រូវបានផ្តល់ប្រាក់ឈ្នួលពាក់កណ្តាលនោះទេ ប៉ុន្តែមានសិទ្ធិទទួលបានប្រាក់ចំនួន ២០០០ បាតពីរដ្ឋាភិបាល៕

ដោយ ឈូក បូរ៉ា