បរទេស៖សហរដ្ឋអាមេរិកនិងតៃវ៉ាន់ តាមសេចក្តីរាយការណ៍ បានបន្តជាថ្មីនូវកិច្ចពិភាក្សាជំនួញ សម្រាប់ជាលើកដំបូង ក្នុងរយៈពេល៥ឆ្នាំ ស្របពេលដែលភាគីទាំងពីរសហការគ្នាកាន់តែជិតស្និទ្ធ បើទោះជាមានការព្រមានថ្មីៗនេះ ពីប្រទេសចិន មិនឲ្យមានការជ្រៀតជ្រែក ក៏ដោយ។
ការិយាល័យតំណាង ជំនួញសហរដ្ឋអាមេរិក បាននិយាយនៅថ្ងៃពុធ សប្ដាហ៍នេះថា ភាគីទាំងពីរបានពិភាក្សាគ្នាអំពី សិទ្ធិការងារនិងកម្មសិទ្ធិបញ្ញា និងបានព្រមព្រៀងគ្នា ប្រារព្ធធ្វើកិច្ចពិភាក្សា ជាប្រក្រតីថែមទៀត នៅក្នុងអំឡុងកិច្ចប្រជុំ ក្រុមប្រឹក្សាកិច្ចព្រមព្រៀង ទម្រង់ការងារជំនួញ និងវិនិយោគលើកទី១១។
ជំនួយការតំណាង ជំនួញសហរដ្ឋអាមេរិក លោក Terry McCartin និងលោក Jen-ni Yang តំណាងជំនួញរងមកពីការិយាល័យចរចាជំនួញរបស់តៃវ៉ាន់ បានដឹកនាំកិច្ចប្រជុំ និងបានបង្ហាញនូវការគាំទ្រ សម្រាប់ការងាររួមគ្នា ដើម្បីធ្វើឲ្យកាន់តែប្រសើរឡើង នូវសន្តិសុខនិងភាពធន់ នៃសង្វាក់ផ្គត់ផ្គង់ដ៏សំខាន់។
លោក John Feng ជាប្រធានមន្ត្រីចរចាជំនួញតៃវ៉ាន់ បានមានប្រសាសន៍ថា កិច្ចប្រជុំគឺជាការបោះជំហានដ៏សំខាន់មួយ ឆ្ពោះទៅរកការចុះហត្ថលេខាកិច្ចព្រមព្រៀងជំនួញទាំងស្រុង ជាមួយសហរដ្ឋអាមេរិក នេះបើតាមសេចក្តីរាយការណ៍ ពីកាសែត Bloomberg នៅថ្ងៃពុធសប្ដាហ៍នេះ៕
ប្រែសម្រួល៖ប៉ាង កុង
