បរទេស ៖ សហរដ្ឋអាមេរិក នាពេលថ្មីៗនេះ បានបន្ថែមប្រទេសតួកគីចូលក្នុងបញ្ជីប្រទេស ដែលពាក់ព័ន្ធក្នុងការប្រើប្រាស់ ទាហានកុមារ ក្នុងរយៈមួយឆ្នាំកន្លងទៅ ហើយការធ្វើបែបនេះ ទំនងជានឹងធ្វើឲ្យកាន់តែស្មុគស្មាញ ខ្លាំងឡើងថែមទៀត ចំពោះចំណងមិត្តភាព រវាងប្រទេសទាំងពីរ ដែលបានប្រេះស្រាំ រួចទៅហើយនោះ ។
ក្រសួងការបរទេសអាមេរិក បានធ្វើការកំណត់ នៅក្នុងរបាយការណ៍ជួញ ដូរមនុស្សក្នុងឆ្នាំ២០២១ របស់ខ្លួនថា ប្រទេសតួកគី បានកំពុងតែផ្តល់ការគាំទ្រ ជាក់ស្តែងដល់កងពល Sultan Murad នៅក្នុងប្រទេសស៊ីរី ជាក្រុមប្រឆាំង ស៊ីរីមួយ ដែលទីក្រុងអង់ការ៉ា បានផ្តល់ការគាំទ្រ ជាយូរមកហើយ តែក្រុមនេះត្រូវបានទីក្រុងវ៉ាស៊ីនតោន និយាយថា បានជ្រើសរើស និងប្រើប្រាស់ទាហានកុមារ ។
នៅក្នុងការនិយាយ ដ៏ខ្លីមួយជាមួយ អ្នកសារព័ត៌មាន មន្ត្រីជាន់ខ្ពស់ក្រសួង ការបរទេសអាមេរិកមួយរូប ក៏បានធ្វើការយោង ដល់ការប្រើប្រាស់ទាហាន កុមារនៅក្នុងប្រទេស លីប៊ីផងដែរ ដោយនិយាយថា ទីក្រុងវ៉ាស៊ីនតោន កំពុងសង្ឃឹមថានឹងធ្វើការងារជាមួយទីក្រុងអង់ការ៉ាលើបញ្ហានេះ ដើម្បីដោះស្រាយវា ។
យោងតាមសេចក្តីរាយការណ៍មួយ ដែលចេញផ្សាយដោយទីភ្នាក់ងារ សារព័ត៌មាន Yahoo News នៅថ្ងៃទី០២ ខែកក្កដា ឆ្នាំ២០២១ បានឲ្យដឹងថា នៅពេលភ្លាមៗនេះ នៅមិនទាន់មានប្រតិកម្មណាមួយ ពីប្រទេសតួកគី អំពីបញ្ហាប្រើប្រាស់ទាហាន កុមារនេះនៅឡើយនោះទេ ៕ ប្រែសម្រួល៖ប៉ាង កុង
