តូក្យូ ៖ ប្រភពពីរដ្ឋាភិបាលជប៉ុន បានឲ្យដឹងថា ប្រទេសជប៉ុន មានគម្រោងរៀបចំកិច្ចប្រជុំរដ្ឋមន្ត្រី ការបរទេសនិម្មិត នៅសប្តាហ៍ក្រោយ ជាមួយប្រទេសអាស៊ី អាគ្នេយ៍ចំនួន ៥ នៅតាមដងទន្លេមេគង្គ រួមទាំងប្រទេសមីយ៉ាន់ម៉ា ដែលយោធាបានដណ្តើម អំណាចនៅក្នុងរដ្ឋប្រហារ កាលពីខែកុម្ភៈ។
ប្រភពបានឲ្យដឹងថា កិច្ចប្រជុំបានរៀបចំ សម្រាប់ថ្ងៃទី០៦ ខែសីហា ធ្វើឡើងបន្ទាប់ពីប្រទេសជប៉ុន បានពន្យារពេល ការប្រមូលផ្ដុំគ្នា ដែលគ្រោងនឹងធ្វើនៅខែមីនា ឆ្នាំនេះ ដោយបារម្ភថា វានឹងត្រូវបានគេមើលឃើញថា ជាការទទួលស្គាល់ របបយោធា នៅក្នុងប្រទេសមីយ៉ាន់ម៉ា។
ប៉ុន្តែប្រទេសជប៉ុន បានសម្រេចចិត្តបន្តកិច្ចប្រជុំ បន្ទាប់ពីប្រទេសចិន ធ្វើជាម្ចាស់ផ្ទះកិច្ចប្រជុំជាមួយសមាគមប្រជាជាតិ អាស៊ីអាគ្នេយ៍ ដែលមានសមាជិក ១០ ប្រទេសរួមទាំងមីយ៉ាន់ម៉ា កាលពីខែមិថុនា ហើយសហរដ្ឋអាមេរិក ក៏បានជួបស្ទើរតែទាំងអស់ ជាមួយរដ្ឋមន្ត្រី ការបរទេស អាស៊ាននៅថ្ងៃទី១៤ ខែកក្កដាផងដែរ ។
រដ្ឋមេគង្គ គឺមានប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម។ ប្រភពក្រសួងការបរទេសជប៉ុន បានឲ្យដឹងថា បណ្តាប្រទេស មេគង្គ កំពុងស្វែងរកកិច្ច សហប្រតិបត្តិការបន្ថែមទៀត ជាមួយប្រទេសជប៉ុន ដោយមិនគិតពីការវិវត្ត នៅក្នុងប្រទេសមីយ៉ាន់ម៉ា ។
នៅឯកិច្ចប្រជុំដែលនឹងត្រូវធ្វើឡើង នៅចំពោះមុខការជួបជុំ ដែលទាក់ទងនឹងអាស៊ាន ចាប់ពីថ្ងៃច័ន្ទនេះ ប្រទេសជប៉ុន នឹងអំពាវនាវឱ្យអ្នកចូលរួមមក ពីប្រទេសមីយ៉ាន់ម៉ា បញ្ចប់អំពើហិង្សា លើអ្នកតវ៉ាដោយសន្តិវិធី និងទទួលបេសកជនពិសេស ដែលអាស៊ាន បានសម្រេចចិត្ត បញ្ជូន ដើម្បីជួយដោះស្រាយ វិបត្តិដែលបង្កឡើង ដោយរដ្ឋប្រហារយោធា ។
ប្រទេសជប៉ុន មើលឃើញតំបន់ទន្លេមេគង្គ ដែលមានទីតាំង នៅជិតមហាអំណាចក្នុងតំបន់ពីរ គឺឥណ្ឌា និងចិន ក៏ដូចជាផ្លូវដឹកជញ្ជូនសំខាន់ៗ នៅសមុទ្រចិនខាងត្បូង ដែលមានសារៈសំខាន់ខាងភូមិសាស្ត្រ នយោបាយ ៕
ដោយ ឈូក បូរ៉ា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
