បរទេស៖ ការកើនឡើងនៃអំពើហឹង្សា នៅទូទាំងប្រទេសអាហ្វហ្គានីស្ថាន ក្នុងរយៈពេលប៉ុន្មាន សប្តាហ៍ចុងក្រោយនេះ បានធ្វើឱ្យបុគ្គលិកជំនួយ មានការភ្ញាក់ផ្អើលយ៉ាងខ្លាំង ខណៈដែលប្រទេសនេះ កំពុងឆ្ពោះទៅរកគែម នៃវិបត្តិមនុស្សធម៌ដ៏ធំមួយ។ នេះបើតាមនាយករបស់ក្រុមប្រឹក្សា ជនភៀសខ្លួនន័រវែស (NRC)បាននិយាយកាលពីថ្ងៃសុក្រ។
យោងតាមសារព័ត៌មាន Sputnik ចេញផ្សាយនៅថ្ងៃទី១៣ ខែសីហា ឆ្នាំ២០២១ បានឱ្យដឹងថា លោក Tracey Van Heerden បាននិយាយថា «យើងកំពុងរៀបចំខ្លួនយើងសម្រាប់វិបត្តិមនុស្សធម៌ដ៏ធំមួយ។ គ្រួសារដ៏គួរឱ្យភ័យខ្លាចបានភៀសខ្លួនទៅទីក្រុងកាប៊ុល កាលពីប៉ុន្មានថ្ងៃមុន។ ជំរុំពោរពេញទៅដោយមនុស្ស ហើយយើងខ្លាចស្ថានការណ៍នេះកំពុងកើតឡើងនៅទូទាំងប្រទេសអាហ្វហ្គានីស្ថាន ក្នុងល្បឿនមួយដែលមិនធ្លាប់មានពីមុនមក»។
មន្រ្តី NRC បាននិយាយថា ការប្រយុទ្ធគ្នារវាងក្រុមតាលីបង់ និងកងកម្លាំងសន្តិសុខអាហ្វហ្គានីស្ថាន បានជះឥទ្ធិពលដល់ប្រតិបត្តិការរបស់អង្គការសប្បុរសធម៌ ដែលមានមូលដ្ឋាននៅទីក្រុងអូស្លូ រួមទាំងការផ្តល់ជំនួយសំខាន់ៗដល់អាហ្វហ្គានីស្ថានជាង ៩០០.០០០ នាក់។
លោក Van Heerden បានបន្ថែមថា“ ខណៈដែលប្រទេសអាហ្វហ្គានីស្ថាន នៅតែជាប្រទេសមួយក្នុងចំណោមប្រទេស ដែលគ្រោះថ្នាក់បំផុត នៅលើពិភពលោក សម្រាប់យើងក្នុងការដំណើរការ វាមានសារៈសំខាន់ជាងពេលណាៗទាំងអស់ ដែលទីភ្នាក់ងារផ្តល់ជំនួយ អាចទៅដល់សហគមន៍ នៅពេលដែលជម្លោះកំពុងកើនឡើង” ៕
ប្រែសម្រួលៈ ណៃ តុលា
