យូអិន៖ អគ្គលេខាធិការ អង្គការសហប្រជាជាតិលោក Antonio Guterres បានអំពាវនាវឱ្យក្រុមសកម្មប្រយុទ្ធ តាលីបង់ បញ្ឈប់ការវាយលុក របស់ពួកគេប្រឆាំងនឹង កងកម្លាំងរដ្ឋាភិបាលជាបន្ទាន់ ហើយវិលត្រឡប់មកតុចរចាវិញ ដោយស្មោះត្រង់ ដើម្បីផលប្រយោជន៍អាហ្វហ្កានីស្ថាន និងប្រជាជនរបស់ខ្លួន។
មន្ត្រីជាន់ខ្ពស់អង្គការសហប្រជាជាតិ បានប្រាប់អ្នកយកព័ត៌មាននៅទីស្នាក់ការកណ្តាលរបស់អង្គការសហប្រជាជាតិនៅទីក្រុងញូវយ៉កថា តម្រូវការមនុស្សធម៌កំពុងកើនឡើងជាលំដាប់ ហើយប្រទេសនេះស្ទើរតែមិនអាចគ្រប់គ្រងបាន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានលើកឡើងថា“ សូម្បីតែសម្រាប់ប្រទេស ដែលបានស្គាល់ជម្លោះជាច្រើនជំនាន់ ហើយក៏មានជាសោកនាដកម្មក៏ដោយ បច្ចុប្បន្នអាហ្វហ្គានីស្ថាន កំពុងស្ថិតនៅក្នុងជំពូកដ៏វឹកវរ និងអស់សង្ឃឹមមួយទៀត ដែលជាសោកនាដកម្ម មិនគួរឱ្យជឿ សម្រាប់ប្រជាជនដែលមានការឈឺចាប់យូរមកហើយរបស់ខ្លួនមួយនេះ” ។
ប្រមុខអង្គការសហប្រជាជាតិបានកត់សម្គាល់ថា ការប្រយុទ្ធគ្នារវាងកងកម្លាំងសន្តិសុខតាលីបង់ និងអាហ្វហ្គានីស្ថាន ដើម្បីគ្រប់គ្រងទីក្រុង និងទីប្រជុំជន កំពុងបង្កឱ្យមានផលប៉ះពាល់យ៉ាងខ្លាំង ជាពិសេសជនស៊ីវិលតែម្ដង។
លោកបានបន្ថែមថា“ យ៉ាងហោចណាស់មនុស្ស ២៤១,០០០ នាក់ត្រូវបានបង្ខំឱ្យភៀសខ្លួនចេញពីផ្ទះរបស់ពួកគេ មន្ទីរពេទ្យធ្លាប់តែពោរពេញទៅដោយស្បៀងអាហារ និងការផ្គត់ផ្គង់វេជ្ជសាស្ត្រ បច្ចុប្បន្នកំពុងធ្លាក់ចុះជាបន្ដបន្ទាប់។ ផ្លូវស្ពានសាលារៀន គ្លីនិក និងហេដ្ឋារចនាសម្ព័ន្ធសំខាន់ៗផ្សេងទៀត កំពុងត្រូវបានបំផ្លាញ” ។
លោកបានបន្ថែមថា“ ការបន្តជម្លោះក្នុងទីក្រុង នឹងមានន័យថា ការសម្លាប់រង្គាលជាបន្តទៀតដោយជនស៊ីវិល ជៀសមិនរួចនោះទេ ដែលថានឹងត្រូវខាតបង់ខ្ពស់បំផុត។
លោកអគ្គលេខាធិការបានបញ្ជាក់បន្ថែមថា “ខ្ញុំសូមអំពាវនាវឱ្យគ្រប់ភាគីទាំងអស់យកចិត្តទុកដាក់ ចំពោះការប៉ះទង្គិចគ្នាដ៏ធ្ងន់ធ្ងរ និងផលប៉ះពាល់បំផ្លិចបំផ្លាញដល់ជនស៊ីវិល។ ពួកគេទាំងអស់ ត្រូវតែធ្វើឱ្យបានច្រើនដើម្បីការពារជនស៊ីវិល” ។
លោក Guterres បានអះអាងថា លោកមានការព្រួយបារម្ភយ៉ាងខ្លាំង ចំពោះរបាយការណ៍ របស់ក្រុមតាលីបង់ ដែលបានដាក់កំហិតយ៉ាងខ្លាំង ទៅលើសិទ្ធិមនុស្ស នៅក្នុងតំបន់ ដែលស្ថិតនៅក្រោមការគ្រប់គ្រងរបស់ពួកគេ ជាពិសេសផ្តោតលើស្ត្រី និងអ្នកកាសែត៕
ដោយ ឈូក បូរ៉ា
