ធ្លាក់យន្តហោះមួយ របស់រុស្សី ទៅជួយដល់កិច្ចការងារ ពន្លត់ភ្លើងឆេះព្រៃ នៅតួកគីស្លាប់៨នាក់

បរទេស៖ យោងតាមការចេញផ្សាយ របស់ទីភ្នាក់ងារសារព័ត៌មាន ជាតិរបស់រុស្សី TASS បានឲ្យដឹងថាកាលពីថ្ងៃសៅរ៍ម្សិលមិញនេះយន្តហោះមួយគ្រឿង របស់ប្រទេសរុស្សី ដែលត្រូវបានបញ្ចូនទៅ ជួយដល់កិច្ចការងារ ប្រយុទ្ធប្រឆាំង នឹងហេតុការណ៍ភ្លើងឆេះព្រៃ នៅក្នុងប្រទេសតួកគី បានធ្វើឲ្យអ្នកបាត់បង់ជីវិត មានទៅដល់៨នាក់។

TASS បានសរសេរថា ក្រុមអាកាសយានិក ជាយោធារបស់រុស្សី ចំនួន៥នាក់ ព្រមទាំងពលរដ្ឋជនជាតិតួកគី ចំនួន៣នាក់ផ្សេងទៀត ដែលស្ថិត នៅលើយន្តហោះ Be-200 ដែលផលិតនៅក្នុងប្រទេសរុស្សី បានជួបឧប្បទេ្ទវហេតុ នៅក្នុងប្រទេសតួកគី ហើយមកដល់ពេលនេះក្រុមការងារ របស់ក្រសួងការពារជាតិរុស្សី ក៏បានបញ្ចូនកម្លាំង ទៅកន្លែងកើតហេតុផងដែរ ដើម្បីពិនិត្យថាតើមូលហេតុ នៃការធ្លាក់គឺជាអី្វ។

គួរឲ្យដឹងដែរថា ប្រទេសតួកគីបានប្រឈមមុខទៅនឹង​ ហេតុការណ៍ភ្លើងឆេះព្រៃ ដ៏អាក្រក់មួយ នៅភាគខាងត្បូងនិងភាគខាងលិច នៃប្រទេសហើយ ពលរដ្ឋតួកគី និងក្រុមអ្នកទេសចរណ៍ រាប់ពាន់នាក់ ត្រូវបានជន្លៀសរកកន្លែងសុវត្ថិភាព៕

ប្រែសម្រួល៖ស៊ុនលី