បរទេស ៖ មន្ត្រីជាន់ខ្ពស់ អាមេរិកមួយរូប បាននិយាយនៅថ្ងៃព្រហស្បតិ៍ សប្ដាហ៍នេះថា គោលនយោបាយ អាមេរិកលើតៃវ៉ាន់ មិនបានប្រែប្រួលឡើយ ក្រោយលោក ប្រធានាធិបតីអាមេរិក លោក ចូ បៃដិន ហាក់លើកឡើងថា សហរដ្ឋអាមេរិក នឹងការពារកោះ លទ្ធិប្រជាធិបតេយ្យនេះ ប្រសិនបើវារងការ វាយប្រហារ ដែលនេះគឺខុសឆ្ងាយ ពីគោលជំហរមិនច្បាស់លាស់ ជាយូរមកហើយ របស់អាមេរិក ។
នៅក្នុងបទសម្ភាសន៍មួយ ដែលផ្សាយ ដោយកាសែត ABC News នៅថ្ងៃព្រហស្បតិ៍សប្ដាហ៍នេះ លោក បៃដិន ត្រូវបានគេសួរអំពីផលប៉ះពាល់ នៃការដកទ័ពអាមេរិក ចេញពីប្រទេសអាហ្វហ្គានីស្ថាន និងការឆ្លើយតប ចំពោះប្រព័ន្ធផ្សព្វផ្សាយចិន ដែលនិយាយប្រាប់តៃវ៉ាន់ថា នេះបង្ហាញថា ទីក្រុងវ៉ាស៊ីនតោន មិនអាចពឹងពាក់ឲ្យជួយ ការពារខ្លួនបានឡើយ ។
លោកប្រធានាធិបតីអាមេរិករូបនេះ បានឆ្លើយតបថា តៃវ៉ាន់ កូរ៉េខាងត្បូង និងណាតូ គឺជាស្ថានភាព ផ្សេងគ្នាទំាងស្រុង ពីប្រទេសអាហ្វហ្គានីស្ថាន និងហាក់បង្ហាញថា រួមបញ្ចូលតៃវ៉ាន់ជាមួយប្រទេស ដែលទីក្រុងវ៉ាស៊ីនតោន មានការប្តេជ្ញាការពារ យ៉ាងច្បាស់លាស់ ។
លោក បៃដិន មានប្រសាសន៍យ៉ាងដូច្នេះថា “ពួកគេគឺជាអង្គភាព ដែលយើងបានបង្កើតកិច្ចព្រមព្រៀង ជាមួយ ដោយផ្អែកលើ មិនមែនសង្គ្រាមស៊ីវិល ដែលពួកគេមាន នៅលើកោះនោះ ឬក៏ក្នុងប្រទេសកូរ៉េខាងត្បូង ប៉ុន្តែលើកិច្ចព្រមព្រៀងមួយ ដែលពួកគេមាន រដ្ឋាភិបាលសាមគ្គីគ្នា ដែលព្យាយាមរារាំង មនុស្សអាក្រក់ មិនឲ្យធ្វើទង្វើអាក្រក់ ទៅលើពួកគេ” ៕ ប្រែសម្រួល៖ប៉ាង កុង
