តូក្យូ៖ រដ្ឋាភិបាលជប៉ុន បានឲ្យដឹងថា ចក្រភពអង់គ្លេស នឹងរៀបចំកិច្ចប្រជុំលើកដំបូងរបស់ខ្លួនជាមួយសមាជិកនៃកិច្ចព្រមព្រៀងពាណិជ្ជកម្មសេរីភាពជាដៃគូអន្តរប៉ាស៊ីហ្វិកនៅចុងខែនេះ ដើម្បីពិភាក្សាអំពីការស្នើសុំរបស់ទីក្រុងឡុងដ៍ដើម្បីចូលរួមកិច្ចព្រមព្រៀងនេះ។
បន្ទាប់ពីការចាកចេញរបស់ខ្លួនពីសហភាពអឺរ៉ុបចក្រភពអង់គ្លេស មានបំណងពង្រឹងវត្តមានសេដ្ឋកិច្ចរបស់ខ្លួននៅក្នុងតំបន់អាស៊ី-ប៉ាស៊ីហ្វិក។ TPP ដែលមានសមាជិក ១១ ប្រទេស កំពុងព្យាយាមពង្រីកតំបន់របស់ខ្លួន បន្ទាប់ពីសហរដ្ឋអាមេរិក បានដកខ្លួនចេញពីកិច្ចព្រមព្រៀង ក្រោមការដឹកនាំរបស់អតីតប្រធានាធិបតីលោក ដូណាល់ ត្រាំ។
រដ្ឋមន្រ្តីមកពីសមាជិកទាំង ១១ រួមមានជប៉ុនអូស្ត្រាលី និងសិង្ហបុរី បានរៀបចំសន្និសីទវីដេអូរបស់គណៈកម្មការ TPP ដែលជាស្ថាប័នសម្រេចចិត្តរបស់ប្លុក នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
ប្រទេសជប៉ុន ធ្វើជាប្រធានគណៈកម្មការនេះនៅឆ្នាំនេះ និងដឹកនាំក្រុមការងាររបស់ TPP ដើម្បីពិភាក្សាអំពីពន្ធគយ ក៏ដូចជាច្បាប់ពាណិជ្ជកម្ម និងវិនិយោគឆ្ពោះទៅរកការចូលរួមរបស់ទីក្រុងឡុងដ៍។
មន្រ្តីបានឲ្យដឹងថា ដោយសារសមាជិក TPP ជាច្រើនបានចុះហត្ថលេខាលើកិច្ចព្រមព្រៀងពាណិជ្ជកម្មទ្វេភាគីជាមួយចក្រភពអង់គ្លេស គ្មានឧបសគ្គធំណាមួយត្រូវបានរំពឹងទុកនៅក្នុងកិច្ចចរចាចូលជាសមាជិកនោះទេ។ ការសម្រេចចិត្តចុងក្រោយថាតើត្រូវទទួលយកពាក្យសុំរបស់ចក្រភពអង់គ្លេស ត្រូវបានគេរំពឹងថា នឹងធ្វើនៅដើមឆ្នាំក្រោយ។
ប្រសិនបើការចូលរួមរបស់ចក្រភពអង់គ្លេស នឹងជំរុញឱ្យចំណែកនៃប្លុកសេដ្ឋកិច្ចពិភពលោកកើនឡើងដល់ ១៦ ភាគរយពីបច្ចុប្បន្នដែលមាន ១៣ ភាគរយ។
ទីក្រុងឡុងដ៍ បានដាក់សំណើកាលពីខែកុម្ភៈ ដើម្បីចូលរួមក្នុងអ្វីដែលហៅថា ជាផ្លូវការនូវកិច្ចព្រមព្រៀងគ្រប់ជ្រុងជ្រោយ និងវឌ្ឍនភាព សម្រាប់ភាពជាដៃគូអន្តរប៉ាស៊ីហ្វិកឬហៅកាត់ថា CPTPP ។
ប្រទេសនេះគឺជាបេក្ខជនដំបូងគេនៅក្រៅសមាជិកដើម។ ប្រទេសចិន កូរ៉េខាងត្បូង តៃវ៉ាន់ និងថៃ ក៏បានបង្ហាញចំណាប់អារម្មណ៍ក្នុងការចូលរួមជាមួយប្លុកពាណិជ្ជកម្មសេរីនេះផងដែរ។
ប្លុកដែលបានចូលជាធរមាននៅឆ្នាំ២០១៨ បច្ចុប្បន្នមានប្រជាជនសរុបប្រហែល ៥០០ លាននាក់ លើសសហភាពអឺរ៉ុប ដែលមានប្រហែល ៤៤៨ លាននាក់។
ប្រទេសជាសមាជិក TPP គឺអូស្ត្រាលី ប្រ៊ុយណេ កាណាដា ឈីលី ជប៉ុន ម៉ាឡេស៊ី ម៉ិកស៊ិក ណូវែលសេឡង់ ប៉េរូ សិង្ហបុរី និងវៀតណាម។ រហូតមកដល់ពេលនេះមានចំនួន ៨ ក្នុងចំណោមពួកគេបានផ្តល់សច្ចាប័នលើកតិកាសញ្ញានេះហើយ។
កតិកាសញ្ញានេះមានបំណងបង្កើតតំបន់ពាណិជ្ជកម្មសេរីនៅទូទាំងប៉ាស៊ីហ្វិក ដើមឡើយត្រូវបានលើកកម្ពស់ដោយសហរដ្ឋអាមេរិក ក្រោមការគ្រប់គ្រងរបស់លោក បារ៉ាក់ អូបាម៉ា ក្នុងគោលបំណងធ្វើឱ្យមានតុល្យភាពឥទ្ធិពលចិនកើនឡើងនៅក្នុងតំបន់អាស៊ីប៉ាស៊ីហ្វិក។
ប៉ុន្តែអតីតប្រធានាធិបតីអាមេរិកលោក ដូណាល់ ត្រាំ ដែលបានបង្ហាញពីចំណង់ចំណូលចិត្តរបស់លោក ដោយបើកចំហ ចំពោះកិច្ចព្រមព្រៀងពាណិជ្ជកម្មទ្វេភាគី និងមិនមែនក្របខ័ណ្ឌពហុភាគីក្រោមគោលនយោបាយ ដែលគេហៅថា“ អាមេរិកទីមួយ” របស់លោក បានដកខ្លួនចេញពី TPP ភ្លាមៗបន្ទាប់ពីឡើងកាន់តំណែងក្នុងឆ្នាំ ២០១៧៕
ដោយ ឈូក បូរ៉ា
