បរទេស៖ នាយករដ្ឋមន្ត្រីចិន លោក Li Keqiang បានជំរុញឲ្យមហាអំណាចធំៗ បង្ហាញនូវទំនួលខុសត្រូវនិងដើរតួនាទីនាំមុខ ក្នុងការធ្វើឲ្យប្រសើរឡើង នូវអភិបាលកិច្ចបរិស្ថានសកល និងធ្វើការដោះស្រាយបញញហាប្រឈមមុខ ដូចជាបម្រែបម្រួលអាកាសធាតុជាដើម។
ថ្លែងតាមវីដេអូខលនៅក្នុងពិធី បើកសន្និបាតអភិរក្សពិភពលោក IUCN កាលពីថ្ងៃសុក្រនោះ លោក Li Keqiang បានមានប្រសាសន៍ថា ប្រទេសនានា គួរតែប្រើប្រាស់អង្គការសហប្រជាជាតិ ដើម្បីបង្កើនច្បាប់សកល និងបង្កើតប្រព័ន្ធអភិបាលកិច្ចដែលប្រកបដោយយុត្តិធម៌ មានទំនួលខុសត្រូវ និងចែករំលែកផលប្រយោជន៍។
លោកនាយករដ្ឋមន្ត្រីចិនរូបនេះ បានមានប្រសាសន៍បន្ថែមទៀត យ៉ាងដូច្នេះថា “សហគមន៍អន្តរជាតិ ត្រូវតែប្រើការប្តេជ្ញានិងចំណាត់ការមិនធ្លាប់មាន ដើម្បីលើកកម្ពស់ការកសាង ពិភពលោកដ៏ស្រស់ស្អាត តាមដែលមនុស្សជាតិមានភាពសុខដុមជាមួយធម្មជាតិ”។
គួរបញ្ជាក់ថា ប្រទេសចិនកំពុងតែលើកកម្ពស់គោលគំនិត នៃភាពសុខដុម ជាមួយធម្មជាតិ និងការប្រើប្រាស់ដំណោះស្រាយផ្អែកលើធម្មជាតិ ស្របពេលដែលខ្លួនត្រៀមធ្វើជាម្ចាស់ផ្ទះ នៃកិច្ចចរចាសកល ស្តីពីកិច្ចព្រមព្រៀងជីវចម្រុះថ្មីមួយ ដែលគ្រោងប្រព្រឹត្តទៅនៅក្នុងទីក្រុង Kunming នាខែតុលា៕ ប្រែសម្រួល៖ប៉ាង កុង
