បរទេស៖ យោងតាមការអះអាង ដោយមន្ត្រីរដ្ឋាភិបាល របស់ប្រទេសអ៊ុយក្រែន កាលពីចុងសប្តាហ៍កន្លងមក បានឲ្យដឹងថាពលរដ្ឋ ដែលជាអ្នករស់នៅ ក្នុងតំបន់ Crimea ចំនួនជាង៥០នាក់ ត្រូវបានអាជ្ញាធរ នៃប្រទេសរុស្សី ចាប់ខ្លួនមិនទាន់ដោះលែងវិញ នៅឡើយ។
ការចាប់ខ្លួនពលរដ្ឋ ក្នុងតំបន់ Crimea ទាំងជាង៥០នាក់នេះ ធ្វើឡើងនៅក្រោយពេល ដែលពួកគេបាននាំគ្នា ទៅធ្វើការតវ៉ាប្រឆាំង ទៅនឹងអាជ្ញាធររុស្សី ដែលបាន ធ្វើការចាប់ខ្លួន មេដឹកនាំសិទ្ធមនុស្ស និងពលរដ្ឋ Crimea ចំនួន៥រូប កាលពីពេលកន្លងមក។
ប្រភពដដែលបានបញ្ជាក់ទៀតថា ក្នុងនោះក៏មានវត្តមាន របស់អ្នកកាសែតចំនួន២រូបផងដែរ ហើយមកដល់ពេលនេះ ទាំងអាជ្ញាធរ របស់រុស្សី និងអជ្ញាធររបស់ Crimeaនៅមិនទាន់ហ៊ាន ចេញសេចក្តីថ្លែងការណ៍ ណាមួយ អំពីបញ្ហានេះនៅឡើយទេ។
គួរឲ្យដឹងដែរថា រុស្សី បានចូលកាន់កាប់តំបន់ Crimea នេះពីប្រទេសអ៊ុយក្រែន តាំងតែពីឆ្នាំ២០១៤ ហើយចាប់តាំងពីឆ្នាំនោះ មកពលរដ្ឋក្នុងតំបន់ បានភៀសខ្លួនចេញពីទីនេះ មានចំនួនជាង៣០០០០នាក់ មកហើយ៕
