ព័ត៌មានអន្តរជាតិ

បារាំង កោះហៅឯកអគ្គរដ្ឋទូតប្រចាំនៅអាមេរិក និងអូស្រ្ដាលី ជុំវិញជម្លោះទិញលក់នាវាមុជទឹក

ប៉ារីស៖ ប្រទេសបារាំង បានសម្រេចចិត្តកោះហៅឯកអគ្គរដ្ឋទូតរបស់ខ្លួនប្រចាំនៅសហរដ្ឋអាមេរិកនិងអូស្ត្រាលី ដើម្បីទទួលបានការពិគ្រោះយោបល់បន្ទាប់ពីទីក្រុងកង់បេរ៉ា បានលុបចោលកិច្ចព្រមព្រៀងមួយ ដើម្បីទិញនាវាមុជទឹក ដែលរចនាឡើងដោយបារាំង ហើយបានសម្រេចចិត្តវិនិយោគលើនាវាមុជទឹកដើរដោយថាមពលនុយក្លេអ៊ែររបស់អាមេរិក។

រដ្ឋមន្រ្តីបារាំងប្រចាំទ្វីបអឺរ៉ុប និងកិច្ចការបរទេសលោក Jean-Yves Le Drian បានឲ្យដឹងនៅក្នុងសេចក្តីថ្លែងការណ៍មួយនៅថ្ងៃសុក្រនេះថា តាមសំណើរបស់ប្រធានាធិបតីនៃសាធារណរដ្ឋ ខ្ញុំបានសម្រេចចិត្តកោះហៅឯកអគ្គរដ្ឋទូត មកទីក្រុងប៉ារីស វិញភ្លាមៗដើម្បីពិគ្រោះយោបល់ជាមួយឯកអគ្គរដ្ឋទូតយើងទាំងពីរ នៅសហរដ្ឋអាមេរិក និងអូស្ត្រាលី។

នេះគឺជាលើកទីមួយក្នុងប្រវត្តិសាស្ត្របារាំង ដែលការសម្រេចចិត្តបែបនេះត្រូវបានធ្វើឡើងតាមប្រទេសទាំងពីរ នេះបើយោងតាមប្រព័ន្ធផ្សព្វផ្សាយបារាំង។

នៅព្រឹកថ្ងៃនេះរដ្ឋមន្រ្តីក្រសួងការបរទេសទទួលបន្ទុកកិច្ចការអ៊ឺរ៉ុបលោកស្រី Clement Beaune បានលើកឡើងថា បារាំង មិនអាចជឿទុកចិត្តលើអូស្រ្តាលី ក្នុងកិច្ចចរចាពាណិជ្ជកម្ម ដែលកំពុងបន្តជាមួយសហភាពអឺរ៉ុប (EU) បន្ទាប់ពីភាពជាដៃគូសន្តិសុខថ្មី ដែលមានឈ្មោះថា“ AUKUS” (អូស្ត្រាលី-អង់គ្លេស-អាមេរិក) ត្រូវបានបង្ហាញដោយប្រទេសទាំង៣ កាលពីថ្ងៃពុធកន្លងទៅ។

គំនិតផ្តួចផ្តើមដំបូងក្រោមភាពជាដៃគូត្រីភាគី នឹងត្រូវបញ្ជូនកងនាវាមុជទឹកដើរដោយថាមពលនុយក្លេអ៊ែរទៅអូស្រ្តាលី ដោយសហរដ្ឋអាមេរិក និងចក្រភពអង់គ្លេស ខណៈកាលពីឆ្នាំ ២០១៦ អូស្ត្រាលី បានចុះកិច្ចសន្យាជាមួយបារាំង សម្រាប់ការទិញនាវាមុជទឹកប្រើម៉ាស៊ូត-អគ្គិសនីធម្មតាចំនួន ១២ គ្រឿង។

លោក Le Drian កាលពីថ្ងៃព្រហស្បតិ៍បានហៅការផ្លាស់ប្តូរត្រីភាគីនេះថាជា“ ការចាក់ចំពីក្រោយខ្នង” ។ លោកបានលើកឡើងថា“ យើងបានបង្កើតទំនាក់ទំនងជឿទុកចិត្តជាមួយអូស្ត្រាលី។ ការទុកចិត្តនេះត្រូវបានគេក្បត់” ។

លោកបានបន្ថែមថា“ អាកប្បកិរិយារបស់អាមេរិកធ្វើឱ្យខ្ញុំព្រួយបារម្ភ ការសម្រេចចិត្តឯកតោភាគី និងឃោរឃៅនេះ គឺស្រដៀងនឹងអ្វីដែលលោក ដូណាល់ ត្រាំ បានធ្វើក្នុងអាណត្ដិរបស់លោក”៕


ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top