ប្រធានាធិបតី សហរដ្ឋអាមេរិក លោក ចូ បៃដិន នឹងនៅជាមួយ ប្រជាជាតិអាស៊ីអាគ្នេយ៏ ដើម្បីការពារសេរីភាព និងលទ្ធិប្រជាធិបតេយ្យ

វ៉ាស៊ីនតោន៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី២៨ ខែតុលា ឆ្នាំ២០២១ថា លោក ចូ បៃដិន ប្រធានាធិបតីសហរដ្ឋអាមេរិក បានថ្លែងប្រាប់ដល់ប្រជាជាតិអាស៊ីអាគ្នេយ៍ កាលពីថ្ងៃពុធថា សហរដ្ឋអាមេរិក នឹងឈរជាមួយពួកគេក្នុងការការពារសេរីភាពនៃសមុទ្រ និងលទ្ធិប្រជាធិបតេយ្យ ហើយបានហៅសកម្មភាពរបស់ចិន ចំពោះកោះតៃវ៉ាន់ថា “បង្ខិតបង្ខំ” និងជាការគំរាមកំហែងដល់សន្តិភាព និងស្ថិរភាព ។

ថ្លែងនៅក្នុងកិច្ចប្រជុំកំពូលអាស៊ីបូព៌ាដែលចូលរួមដោយនាយករដ្ឋមន្ត្រីចិន លោក Li Keqiang លោក បៃដិន បានថ្លែងថា ក្រុងវ៉ាស៊ីនតោន នឹងចាប់ផ្តើមកិច្ចពិភាក្សាជាមួយដៃគូនៅឥណ្ឌូប៉ាស៊ីហ្វិក អំពីការអភិវឌ្ឍន៍ក្របខ័ណ្ឌសេដ្ឋកិច្ចនៅក្នុងតំបន់ នេះជារឿងមួយដែលអ្នករិះគន់និយាយថា ជាយុទ្ធសាស្រ្តក្នុងតំបន់របស់គាត់តែប៉ុណ្ណោះ ។

អាស៊ីអាគ្នេយ៍បានក្លាយជាសមរភូមិយុទ្ធសាស្ត្ររវាងសហរដ្ឋអាមេរិក និងចិន ដែលគ្រប់គ្រងភាគច្រើននៃសមុទ្រចិនខាងត្បូង ហើយក្រុងប៉េកាំង បានបង្វែរសម្ពាធផ្នែកយោធា និងនយោបាយមកលើកោះតៃវ៉ាន់ ដែលជាកោះគ្រប់គ្រងដោយខ្លួនឯង ដែលក្រុងប៉េកាំងចាត់ទុករបស់ខ្លួន ។

លោក បៃដិន បានរំលឹកឡើងវិញថា សហរដ្ឋអាមេរិក មានការប្តេជ្ញាចិត្ត ”ដាច់ខាត” ចំពោះតៃវ៉ាន់ ។ លោក បៃដិន បានថ្លែងថា “យើងមានការព្រួយបារម្ភយ៉ាងខ្លាំងចំពោះការបង្ខិតបង្ខំ … សកម្មភាពរបស់ប្រទេសចិន” ដោយចោទប្រកាន់ថា ពួកគេ “គំរាមកំហែងដល់សន្តិភាព និងស្ថិរភាពក្នុងតំបន់” ។

លោក Li Keqiang បានប្រាប់កិច្ចប្រជុំកំពូលដែលបានប្រមូលផ្តុំមេដឹកនាំនៃសមាគមប្រជាជាតិអាស៊ីអាគ្នេយ៍ ហៅកាត់ថា (អាស៊ាន) ទាំង១០ ជាមួយដៃគូក្នុងតំបន់ថា ការរក្សាសន្តិភាព ស្ថិរភាព សេរីភាពនៃការធ្វើនាវាចរណ៍ និងការហោះហើរលើសមុទ្រចិនខាងត្បូង គឺជាផលប្រយោជន៍របស់មនុស្សគ្រប់គ្នា។ លោកបានលើកឡើងថា “សមុទ្រចិនខាងត្បូង គឺជាផ្ទះរួមរបស់យើង” ។

គួររំលឹកថា លោក បៃដិន កាលពីសប្តាហ៍មុនបានថ្លែងថា សហរដ្ឋអាមេរិក ដែលមានកាតព្វកិច្ចដោយច្បាប់ឆ្នាំ១៩៧៩ ដើម្បីផ្តល់មធ្យោបាយការពារដល់កោះតៃវ៉ាន់ នឹងមកការពារកោះតៃវ៉ាន់ ប្រសិនបើវាត្រូវបានវាយប្រហារដោយប្រទេសចិន៕

ដោយ៖ ម៉ៅ បុប្ផាមករា