ប៉េកាំង៖ ក្រុមឃ្លាំមើលមួយបានព្រមានថា កិច្ចព្រមព្រៀងសន្តិសុខ និងការពារត្រីភាគីដែលអាចឱ្យប្រទេសអូស្ត្រាលី បង្កើនសមត្ថភាពយោធារបស់ខ្លួនតាមរយៈការទទួលបាននាវាមុជទឹកដើរដោយថាមពលនុយក្លេអ៊ែរគឺ “មានបញ្ហាខ្ពស់” និង “បង្កើនហានិភ័យ សម្រាប់ការរីកសាយភាយនុយក្លេអ៊ែរ” នៅក្នុងតំបន់ប៉ាស៊ីហ្វិក។
លោកស្រី Maureen Penjueli អ្នកសម្របសម្រួលនៃបណ្តាញប៉ាស៊ីហ្វិក ស្តីពីសកលភាវូបនីយកម្ម ដែលជាអ្នកឃ្លាំមើលប្រចាំតំបន់ ដែលលើកកម្ពស់ប៉ាស៊ីហ្វិកថា “សន្ធិសញ្ញាសន្តិសុខ និងការពារសព្វថ្ងៃនេះ គឺអំពីមហាសមុទ្រប៉ាស៊ីហ្វិក ដែលជាផ្ទះរបស់យើង ប៉ុន្តែវាមិនដែលមានជាមួយប្រជាជនប៉ាស៊ីហ្វិកនោះទេ”។
អូស្ត្រាលី អង់គ្លេស និងសហរដ្ឋអាមេរិក នៅពាក់កណ្តាលខែកញ្ញា បានប្រកាសពីភាពជាដៃគូសន្តិសុខ ដែលក្នុងនោះ អង់គ្លេស និងសហរដ្ឋអាមេរិក នឹងចែករំលែកបច្ចេកវិទ្យានាវាមុជទឹកនុយក្លេអ៊ែរ ដែលមានភាពរសើបខ្លាំងជាមួយអូស្ត្រាលី។
លោកស្រី Penjueli បានរិះគន់អូស្ត្រាលី ចំពោះការរំលោភលើការសន្យារបស់ខ្លួនក្នុងនាមជាភាគីនៃសន្ធិសញ្ញាតំបន់គ្មាននុយក្លេអ៊ែរនៅប៉ាស៊ីហ្វិកខាងត្បូង ដែលត្រូវបានគេស្គាល់ថា ជាសន្ធិសញ្ញា Rarotonga ដែលជាកិច្ចព្រមព្រៀងមិនរីកសាយភាយ និងរំសាយអាវុធនុយក្លេអ៊ែរដ៏សំខាន់របស់តំបន់ ក៏ដូចជាការមិនយកចិត្តទុកដាក់របស់ទីក្រុងកង់បេរ៉ា ចំពោះកង្វល់សន្តិសុខរបស់ប្រជាជននៅក្នុងតំបន់ នេះ។
លោកស្រី Penjueli បានលើកឡើងថា “យើងឃើញអូស្ត្រាលី ដើរតួជាគន្លឹះ ជារឿយៗជាឯកតោភាគី ដោយធ្វើការសម្រេចចិត្តជុំវិញសន្តិភាព និងសន្តិសុខ ដែលមិនស្របតាមអាទិភាពភ្លាមៗរបស់ប្រជាជនប៉ាស៊ីហ្វិក ជុំវិញសន្តិសុខ ជាពិសេសសន្តិសុខមនុស្ស” ដោយកត់សម្គាល់ថា AUKUS លើកឡើងពីការព្រួយបារម្ភយ៉ាងខ្លាំង ចំពោះចេតនារបស់អូស្ត្រាលី សម្រាប់ ប្រទេស ជិត ខាង កោះ របស់ ខ្លួន”។
អ្នកសម្របសម្រួលបានបន្ថែមថា “រដ្ឋាភិបាលកោះប៉ាស៊ីហ្វិក និងសង្គមស៊ីវិល បានឈានមុខគេក្នុងការតស៊ូមតិ ដើម្បីប៉ាស៊ីហ្វិកគ្មាននុយក្លេអ៊ែរ និងឯករាជ្យ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
នៅក្នុងសេចក្តីថ្លែងការណ៍នោះ លោកស្រីក៏បានលើកឡើងផងដែរថា AUKUS មិនមែនជាមូលហេតុតែមួយគត់ សម្រាប់ការថប់បារម្ភនុយក្លេអ៊ែរនៅក្នុងតំបន់នោះទេ ខណៈដែលប្រទេសជប៉ុន គ្រោងនឹងបញ្ចេញទឹកសំណល់វិទ្យុសកម្មចេញពីរោងចក្រនុយក្លេអ៊ែរ Fukushima Daiichi ទៅក្នុងសមុទ្រ៕ដោយ ឈូក បូរ៉ា
