អ៊ីស្លាម៉ាបាដ៖ ឧបនាយករដ្ឋមន្ត្រីនៃរដ្ឋាភិបាលបណ្តោះអាសន្នរបស់តាលីបង់ ក្នុងប្រទេសអាហ្វហ្គានីស្ថាន បានអំពាវនាវឱ្យឯកអគ្គរដ្ឋទូតជប៉ុន បើកស្ថានទូតរបស់ប្រទេសនេះឡើងវិញនៅទីក្រុងកាប៊ុល នៅពេលដែលអ្នកទាំងពីរបានជួបគ្នានៅរដ្ឋធានីនៃប្រទេស ដែលហែកហួរដោយសង្រ្គាមមួយនេះ។
សំណើនេះត្រូវបានធ្វើឡើងនៅពេលដែល Abdul Ghani Baradar បានជួបឯកអគ្គរដ្ឋទូត ជប៉ុនលោក Takashi Okada ក្រុមតាលីបង់បានឲ្យដឹងថា ប្រទេសជប៉ុនបានបិទស្ថានទូតរបស់ខ្លួនជាបណ្តោះអាសន្ននៅទីក្រុងកាប៊ុល កាលពីថ្ងៃទី១៥ ខែសីហា ដែលជាថ្ងៃដែលពួកតាលីបង់បានគ្រប់គ្រងប្រទេសប្រកបដោយប្រសិទ្ធភាព ខណៈដែលសហរដ្ឋអាមេរិកបានត្រៀមខ្លួន ដើម្បីដកកងកម្លាំងរបស់ខ្លួន។នាពេលនោះ
ជប៉ុនបានជម្លៀសបុគ្គលិកស្ថានទូតរបស់ខ្លួនចេញពីអាហ្វហ្គានីស្ថាន ហើយបានផ្លាស់ប្តូរប្រតិបត្តិការការទូតទៅកាន់រដ្ឋធានីដូហារបស់កាតា ជំនួសវិញ នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
ក្រុមតាលីបង់ក៏បានឲ្យដឹងផងដែរថា លោក Okada បានបង្ហាញពីចេតនារបស់ទីក្រុងតូក្យូក្នុងការបើកស្ថានទូតរបស់ខ្លួនឡើងវិញ ប្រសិនបើសុវត្ថិភាពត្រូវបានធានានៅពេលដែលលោកបានជួបជាមួយឧបនាយករដ្ឋមន្ត្រីលោក Abdul Kabir ឧបនាយករដ្ឋមន្ត្រីម្នាក់ទៀតដែលទទួលបន្ទុកកិច្ចការនយោបាយកាលពីថ្ងៃអង្គារ។
មន្ត្រីជាន់ខ្ពស់ក្រសួងការបរទេសជប៉ុន បានឲ្យដឹងថា រដ្ឋាភិបាលកំពុងពិចារណាជម្រើសនៃការបន្តមុខងាររបស់ស្ថានទូតជាមួយបុគ្គលិកក្នុងស្រុក ប៉ុន្តែពេលវេលានៃការបន្តឡើងវិញ “ចាំបាច់ត្រូវសម្របសម្រួលជាមួយប្រទេសដទៃទៀត”។
ទីក្រុងតូក្យូមិនទាន់បានធ្វើការយោងជាផ្លូវការអំពីបញ្ហានេះទេរហូតមកដល់ពេលនេះ ដោយប្រធានខុទ្ទកាល័យលោក Hirokazu Matsuno បានប្រាប់សន្និសីទសារព័ត៌មានកាលពីថ្ងៃព្រហស្បតិ៍នៅទីក្រុងតូក្យូថា “យើងមិនមានផែនការជាក់លាក់ទេនៅពេលនេះ” ។
ទាក់ទងនឹងថាតើរដ្ឋាភិបាលជប៉ុន នឹងទទួលស្គាល់រដ្ឋាភិបាលតាលីបង់នោះលោក Matsuno បានបដិសេធមិនធ្វើអត្ថាធិប្បាយនោះទេ ដោយលើកឡើងថា ស្ថានភាពនៅក្នុងប្រទេសអាហ្វហ្គានីស្ថាន “នៅតែរលូន”៕ដោយ ឈូក បូរ៉ា
