បរទេស៖ អ្វីដែលជាវិធានការមួយទៀតដើម្បីទទួលបានទ្រព្យសកម្មពីបរទេសដោយសារការខកខានមិនបង់ប្រាក់ដែលបានខ្ចី, ប្រទេសចិន ត្រូវបានគេចោទថា បានចូលកាន់កាប់អាកាសយានដ្ឋានអន្តរជាតិ Entebbe និងទ្រព្យសកម្មផ្សេងទៀតក្នុងប្រទេសអាហ្វ្រិកខាងកើតមួយនេះ។
យោងតាមសារព័ត៌មាន Economic Times ចេញផ្សាយនៅថ្ងៃទី២៨ ខែវិច្ឆិកា ឆ្នាំ២០២១ បានឱ្យដឹងថា ប្រធានាធិបតីអ៊ូហ្គង់ដា លោក Yoweri Museveni បានបញ្ជូនគណៈ ប្រតិភូទៅទីក្រុងប៉េកាំងដើម្បីចរចាជាមួយរដ្ឋាភិបាលចិន។
មុននេះ រដ្ឋាភិបាលដែលដឹកនាំដោយលោក Museveni បានចុះហត្ថលេខាលើកិច្ចព្រមព្រៀងជាមួយធនាគារ Exim របស់ប្រទេសចិន ដើម្បីខ្ចីប្រាក់ចំនួន ២០៧លានដុល្លារ ដើម្បីពង្រីកអាកាសយានដ្ឋានអន្តរជាតិ Entebbe ។
ប្រាក់កម្ចីនេះមានរយៈពេលកំណត់រយៈពេល ២០ឆ្នាំ រួមទាំងរយៈពេលអនុគ្រោះរយៈពេល ៧ ឆ្នាំ ប៉ុន្តែឥឡូវនេះវាបានបង្ហាញថា ប្រតិបត្តិការដែលបានចុះហត្ថលេខាជាមួយធនាគារ EXIM របស់ប្រទេសចិនមានន័យថា ប្រទេសអ៊ូហ្គង់ដា បាន “បោះបង់” អាកាសយានដ្ឋានអន្តរជាតិតែមួយគត់របស់ខ្លួន ។ នេះបើយោងតាមគេហទំព័រសារព័ត៌មាន Sahara Reporters.com ជាសារព័ត៌មានមួយដែលផ្តោតលើទ្វីបអាហ្វ្រិក។
យ៉ាងណាមិញ ប្រទេស អ៊ូហ្គង់ដា បានព្យាយាមចរចាឡើងវិញនូវកិច្ចព្រមព្រៀងនេះ ប៉ុន្តែមិនបានជោគជ័យ។ អ៊ូហ្គង់ដាក្នុងខែមីនា ឆ្នាំ ២០២១ បានបញ្ជូនគណៈប្រតិភូទៅទីក្រុងប៉េកាំង ដោយសង្ឃឹមថានឹងធ្វើការចរចាឡើងវិញនូវកិច្ចសន្យាក្នុងកិច្ចព្រមព្រៀង៕
ប្រែសម្រួលៈ ណៃ តុលា
