បរទេស៖ ក្នុងរយៈពេលពីរខែកន្លងមកនេះ កោះតៃវ៉ាន់បានដាក់ពង្រាយទ័ពអាកាសរបស់ខ្លួនក្នុងឱកាសជាច្រើន ដើម្បីបង្ខំឱ្យយន្តហោះចិនផ្លាស់ប្តូរទិសដៅនៅពេលដែលយន្តហោះរបស់ចិនទាំងនោះ បានចូលទៅជិតដែនអាកាសរបស់ខ្លួន។
យោងតាមសារព័ត៌មាន Sputnik ចេញផ្សាយនៅថ្ងៃទី២៩ ខែវិច្ឆិកា ឆ្នាំ២០២១ បានឱ្យដឹងថា ក្រសួងការពារជាតិកោះតៃវ៉ាន់បានប្រកាសថា យន្តហោះរបស់ខ្លួន បានហោះ បណ្តេញយន្តហោះយោធាចិនចំនួន ២៧ គ្រឿងបានចូលទៅក្នុងតំបន់កំណត់អត្តសញ្ញាណការពារ ដែនអាកាសរបស់ខ្លួន។ យន្តហោះដែលដាក់ពង្រាយ “បានព្រមាន” ទៅដល់យន្តហោះរបស់ចិនឱ្យផ្លាស់ប្តូរទិសដៅរបស់ពួកគេ។ កោះនេះក៏បានដំណើរការប្រព័ន្ធការពារដែនអាកាសដើម្បីតាមដានចលនារបស់យន្តហោះចិនផងដែរ។
ក្រុមយន្តហោះរបស់ចិន រួមមានយន្តហោះចម្បាំងចំនួន ១៨គ្រឿង នៃម៉ូដែលមិនជាក់លាក់, យន្តហោះទម្លាក់គ្រាប់បែក H-6 ចំនួន ៥ គ្រឿង ក៏ដូចជាយន្តហោះចាក់សាំងលើអាកាសប្រភេទ Y-20 មួយគ្រឿងផងដែរ។ ក្រសួងការពារជាតិកោះតៃវ៉ាន់ មិនបានបញ្ជាក់ថា យន្តហោះទាំង៣គ្រឿងផ្សេងទៀត ជាប្រភេទអ្វីនោះទេ។
យន្តហោះទម្លាក់គ្រាប់បែក និងយន្តហោះរបស់កងទ័ពរំដោះប្រជាជនជនចិន ឬ PLA បានហោះហើរនៅជិតព្រំដែនភាគខាងត្បូងរបស់កោះតៃវ៉ាន់ មុនពេលងាកចេញ ហើយហោះត្រឡប់ទៅមូលដ្ឋានរបស់ពួកគេវិញ៕
ប្រែសម្រួលៈ ណៃ តុលា
