រតនាគារអាមេរិក ទំនងជានឹងអស់សាច់ប្រាក់ ត្រឹមបំណាច់ខែធ្នូ ប្រសិនបើសភាបរាជ័យ ក្នុងការដំឡើងកម្រិតបំណុល

វ៉ាស៊ីនតោន៖ ការិយាល័យថវិកាសភា (CBO) បានឲ្យដឹងថា ក្រសួងរតនាគារសហរដ្ឋអាមេរិកទំនងជានឹងអស់សាច់ប្រាក់មុនដំណាច់ខែធ្នូ ប្រសិនបើសភាបរាជ័យក្នុងការដំឡើងកម្រិតបំណុល នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ ។

ប្រភពពី CBO បានឲ្យដឹងនៅក្នុងរបាយការណ៍មួយថា រតនាគារសហរដ្ឋអាមេរិក បានឈានដល់ដែនកំណត់បំណុលថ្មីចំនួន ២៨,៩ ពាន់ពាន់លានដុល្លារអាមេរិករួចហើយ ដូច្នេះបច្ចុប្បន្នវាមិនមានកន្លែង សម្រាប់ខ្ចីក្រោមនីតិវិធីប្រតិបត្តិការស្តង់ដាររបស់ខ្លួននោះទេ ដោយបន្ថែមថា នាយកដ្ឋានកំពុងប្រើ “វិធានការវិសាមញ្ញ” ដែលអនុញ្ញាតឲ្យបន្តខ្ចីប្រាក់បន្ថែមក្នុងរយៈពេលកំណត់។

CBO បានប៉ាន់ប្រមាណថា ប្រសិនបើដែនកំណត់បំណុលនៅតែមិនផ្លាស់ប្តូរ ហើយប្រសិនបើរតនាគារសហរដ្ឋអាមេរិកបានផ្ទេរ ១១៨ពាន់លានដុល្លារទៅឱ្យ Highway Trust Fund នៅថ្ងៃទី១៥ ខែធ្នូ ដូចដែលបានគ្រោងទុកនាពេលនេះ រតនាគារទំនងជានឹងអស់សាច់ប្រាក់មុនដំណាច់ខែធ្នូ។

CBO បានឲ្យដឹងថា “ប្រសិនបើវាកើតឡើង រដ្ឋាភិបាលនឹងមិនអាចបង់កាតព្វកិច្ចរបស់ខ្លួនឱ្យបានពេញលេញនោះទេ ហើយខ្លួននឹងពន្យារពេលការបង់ប្រាក់ សម្រាប់សកម្មភាពមួយចំនួន ការខកខានក្នុងកាតព្វកិច្ចបំណុលរបស់ខ្លួន ឬទាំងពីរ”។

ការព្យាករណ៍របស់ CBO បានកើតឡើងនៅពេលដែលរដ្ឋលេខាធិការរតនាគារសហរដ្ឋអាមេរិក Janet Yellen បានជំរុញឱ្យសភាបង្កើនដែនកំណត់បំណុលត្រឹមថ្ងៃទី១៥ ខែធ្នូ។

លោក Yellen បានឲ្យដឹងកាលពីថ្ងៃអង្គារនៅចំពោះមុខគណៈកម្មាធិការធនាគារព្រឹទ្ធសភាថា “ខ្ញុំមិនអាចនិយាយហួសហេតុពេកបានទេថាវាមានសារៈសំខាន់ប៉ុណ្ណា ដែលសភាដោះស្រាយបញ្ហានេះ។ អាមេរិកត្រូវតែបង់វិក្កយបត្ររបស់ខ្លួនទាន់ពេលវេលា និងពេញលេញ។ ប្រសិនបើយើងមិនធ្វើទេ យើងនឹងលុបបំបាត់ការងើបឡើងវិញបច្ចុប្បន្នរបស់យើង”៕ដោយ ឈូក បូរ៉ា