បាងកក៖ ក្រសួងសុខាភិបាលថៃ បានឲ្យដឹងថា ប្រទេសនេះ បានរកឃើញករណីឆ្លងវីរុសកូវីដ-១៩ ប្រភេទអូមីក្រុង សរុបចំនួន ៧៣៩ ករណី គិតមកទល់នឹងពេលនេះ រួមទាំងករណីនាំចូលចំនួន ៤៨៨ ករណី និងការឆ្លងក្នុងស្រុក ចំនួន ២៥១ករណី ។
លោក Supakit Sirilak អគ្គនាយកនៃនាយកដ្ឋាន វិទ្យាសាស្ត្រវេជ្ជសាស្ត្រ មកពីក្រសួងសុខាភិបាលសាធារណៈ បានលើកឡើងថា ទោះបីជាករណីថ្មី នៃជំងឺកូវីដ-១៩ ភាគច្រើន ដែលត្រូវបានរាយការណ៍ នៅក្នុងប្រទេសថៃ នៅតែជាប្រភេទ Delta ក៏ដោយ ក៏ករណីអូមីក្រុង កាន់តែច្រើនបានចាប់ផ្តើមលេចឡើង។
យោងតាមមន្ត្រី ការឆ្លងមេរោគអូមីក្រុង ត្រូវបានគេរកឃើញរួចហើយនៅក្នុងខេត្តចំនួន ៣៣ ដែលក្នុងនោះ ១៩ ត្រូវបានគេដឹងថា មានករណីឆ្លងមេរោគក្នុងតំបន់។ ភាគច្រើននៃអ្នកឆ្លងក្នុងស្រុកទាំងនោះត្រូវបានផ្សារភ្ជាប់ទៅនឹងការឆ្លងពីចង្កោម Kalasin ។
ខេត្តចំនួន ៣ គឺបាងកក កាឡាស៊ីន និងភូកេត មានចំនួនច្រើនជាង ៦0ភាគរយ នៃករណីប្រភេទអូមីក្រុង ទាំងអស់ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ក្រសួងសុខាភិបាលថៃ បានជំរុញឲ្យប្រជាពលរដ្ឋការពារខ្លួន ដោយពាក់ម៉ាស់មុខ ការរក្សាគម្លាតសង្គម និងការលាងដៃ ជាប្រចាំព្រោះវិធានការទាំងនេះ នៅតែមានប្រសិទ្ធភាព ក្នុងការការពារ ការឆ្លងមេរោគកូវីដ-១៩ គ្រប់ប្រភេទ។
មន្ត្រីរដ្ឋាភិបាលត្រូវបានគេប្រាប់ ឱ្យធ្វើការពីផ្ទះបន្ទាប់ពីចូលឆ្នាំសកល ខណៈដែលសាលារៀន អាចពិចារណាឡើងវិញ នូវថ្នាក់អនឡាញ ជាផ្នែកនៃវិធានការ ប្រុងប្រយ័ត្ន ដើម្បីរក្សាប្រទេស ឱ្យមានសុវត្ថិភាព ពីការគំរាមកំហែងកើនឡើង ដែលបង្កឡើងដោយទម្រង់ឆ្លងអូមីក្រុង៕ ដោយ ឈូក បូរ៉ា
