វ៉ាស៊ីនតោន៖ ធនាគារពិភពលោកបានឲ្យដឹង នៅក្នុងទស្សនវិស័យសេដ្ឋកិច្ចសកល ចុងក្រោយរបស់ខ្លួន ដែលបានចេញផ្សាយកាលពីថ្ងៃអង្គារថា សេដ្ឋកិច្ចពិភពលោក កំពុងស្ថិតនៅលើផ្លូវ ក្នុងកំណើនដោយថយចុះក្រោម ៤,១ ភាគរយនៅឆ្នាំនេះ ចំពេលមានរលកថ្មីនៃជំងឺរាតត្បាត ការកើនឡើងអតិផរណា និងការបន្តការរាំងស្ទះ នៃខ្សែសង្វាក់ផ្គត់ផ្គង់។
ទស្សនវិស័យសកលគឺ “ត្រូវបានបិទបាំងដោយ ហានិភ័យធ្លាក់ចុះផ្សេងៗ” រួមទាំងការផ្ទុះឡើងជាថ្មីនៃជំងឺកូវីដ-១៩ ដោយសារទម្រង់នៃមេរោគថ្មី លទ្ធភាពនៃការរំពឹងទុកអតិផរណា ដែលមិនស្ថិតស្ថេរ និងភាពតានតឹងផ្នែកហិរញ្ញវត្ថុ នៅក្នុងបរិបទនៃកម្រិតបំណុលខ្ពស់បំផុត នេះបើយោងតាមរបាយការណ៍ ពាក់កណ្តាលឆ្នាំ។
របាយការណ៍បានកត់សម្គាល់ថា បន្ទាប់ពីការស្ទុះងើបឡើងវិញ ដល់ការប៉ាន់ប្រមាណ ៥,៥ភាគរយនៅឆ្នាំ២០២១ កំណើនសេដ្ឋកិច្ចពិភពលោក ត្រូវបានគេរំពឹងថា នឹងធ្លាក់ចុះគួរឱ្យកត់សម្គាល់មកត្រឹម ៤,១ភាគរយនៅឆ្នាំ២០២២។ ការព្យាករណ៍ចុងក្រោយបំផុត សម្រាប់ឆ្នាំ២០២១ និង ២០២២ គឺ ០,២ភាគរយទាបជាងការព្យាករណ៍ ខែមិថុនារៀងគ្នា។
សេដ្ឋកិច្ចអាមេរិក ត្រូវបានប៉ាន់ប្រមាណថា នឹងកើនឡើង ៥,៦ភាគរយនៅឆ្នាំ២០២១ និងធ្លាក់ចុះកម្រិតមធ្យមដល់ ៣,៧ភាគរយនៅឆ្នាំនេះ។ សេដ្ឋកិច្ចចិន ត្រូវបានប៉ាន់ប្រមាណថា នឹងកើនឡើង ៨ភាគរយនៅឆ្នាំ២០២១ ហើយធ្លាក់ចុះយឺតដល់ត្រឹម ៥,១ភាគរយនៅឆ្នាំនេះ។
របាយការណ៍បានគូសបញ្ជាក់ថា ជំងឺរាតត្បាតកូវីដ-១៩ បានបង្កើនវិសមភាពប្រាក់ចំណូលសកល ដែលមួយផ្នែកបានផ្លាស់ប្តូរការធ្លាក់ចុះ ដែលសម្រេចបានក្នុង រយៈពេលពីរទសវត្សរ៍មុន។
នៅឆ្នាំ២០២៣ ទិន្នផលប្រចាំឆ្នាំត្រូវបានគេរំពឹងថា នឹងនៅតែទាបជាងនិន្នាការ មុនជំងឺរាតត្បាតនៅក្នុងតំបន់ទីផ្សារ ដែលកំពុងរីកចម្រើន និងសេដ្ឋកិច្ចកំពុងអភិវឌ្ឍន៍ទាំងអស់ (EMDE) ផ្ទុយទៅនឹងប្រទេស ដែលមានសេដ្ឋកិច្ចជឿនលឿន ដែលគម្លាតត្រូវបានព្យាករណ៍ថា នឹងថយចុះតិចតួច។
នៅក្នុងទីផ្សារដែលកំពុងរីកចម្រើន និងសេដ្ឋកិច្ចកំពុងអភិវឌ្ឍន៍ ជាពិសេសនៅក្នុងរដ្ឋតូចៗ និងប្រទេសដែលផុយស្រួយ និងរងគ្រោះដោយជម្លោះ – ទិន្នផល និងការវិនិយោគ នឹងនៅតែគួរឱ្យកត់សម្គាល់ នៅក្រោមនិន្នាការមុនការរាតត្បាត “ដោយសារតែអត្រាការចាក់ថ្នាំបង្ការទាប គោលនយោបាយសារពើពន្ធ និងរូបិយវត្ថុកាន់តែតឹងតែង និងស្លាកស្នាមដែលបន្តកើតមានពី ជំងឺរាតត្បាត” ។
អង្គការអភិវឌ្ឍន៍ដែលមាន មូលដ្ឋាននៅទីក្រុងវ៉ាស៊ីនតោន បានអំពាវនាវឱ្យមានការចាក់វ៉ាក់សាំង ជាសាកលយ៉ាងឆាប់រហ័ស និងកំណែទម្រង់ការ បង្កើនផលិតភាពឡើងវិញ ដែលអាចជួយបន្ថយ វិសមភាពរវាងប្រទេស ៕
ដោយ ឈូក បូរ៉ា
